.:: İstanbul Kadı Sicilleri ::.


Rumeli Sadâreti Mahkemesi 127 Numaralı Sicil (H. 1090-1091 / M. 1679-1680)
cilt: 55, sayfa: 309
Hüküm no: 277
Orijinal metin no: [86a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden Şirinî Hacı Mehmed’in küçük çocuklarına zevcelerinden Fâtıma bt. Şaban’ın vasî tayin edildiği

Mahmiye-i İstanbul’da Davudpaşa Mahallesi’nde sâkin iken bundan akdem vefât eden Şirinî el-Hâc Mehmed nâm kimesnenin verâseti zevceteyn-i metrûketeyni Fâtıma bt. Şa‘ban ve Sâliha bt. Abdullah nâm hatunlar ile sulbî sagīr oğulları Ahmed ve Mehmed ve Süleyman ve sulbiye sagīre kızları Fâtıma ve Meryem’e münhasıra olduğu şer‘an zâhir ve müte‘ayyin oldukdan sonra sıgār-ı mezbûrûnun babalarından kendülere ırsen intikāl eden mâllarını hıfz ve ahvâllerini zabt için bir vasî nasb ve ta‘yîn olunmak lâzım ve merkūme Fâtıma mütedeyyine ve perhizkâr olup her vechile vesâyet-i mezkûre uhdesinden gelmeğe kādire olduğunu zeyl-i kitâbda muharrerü’l-esâmî Müslimîn ihbâr etmeğin hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri dahi mezbûre Fâtıma’yı sıgār-ı mezkûrûnun tesviye-i emirlerine kıbel-i şer‘-i hatîrden vasî nasb ve ta‘yîn etdikde ol dahi vesâyet-i mezbûreyi kabûl ve merâsimini kemâ-yenbagī edâya ta‘ahhüd etmeğin mâ-vaka‘a bi’t-taleb ketb olundu.

Fi’l-yevmi’r-râbi‘ aşer min-Rebî‘i’l-evvel li-sene ihdâ ve tis‘în ve elf.

Şuhûdü’l-hâl: Hacı Ali Efendi b. Mehmed, el-Hâc Mustafa b. Ali, Şâtırbaşı Mehmed Ağa, el-Hâc Hüseyin b. ( ).