Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 310 Hüküm no: 278 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce bt. Abdullah’ın kocası Abdullah ile Ayşe ve Fâtıma adlı kişilere verdiği borç parayı teslim aldığı Mahmiye-i İstanbul’da Ali Paşa-yı Atîk Mahallesi’nde sâkine olup zâtı Mahmud Çelebi b. Eyüb ve Ali b. Halil nâm kimesneler ta‘rîfleri ile mu‘arrefe olan Hadîce bt. Abdullah nâm hatun meclis-i şer‘-i hatîrde işbu bâ‘isû’l-kitâb zevci Abdullah b. Mahmud ve Âişe ve Fâtıma bintey Ali mahzarlarında ikrâr ve takrîr-i kelâm edip mezbûrûn Abdullah ve Âişe ve Fâtıma’ya bundan akdem on dört esedî guruşumu ikrâz ve teslîm onlar dahi ale’l-iştirâki’s-seviy yedimden iktirâz ve tesellüm etmişler idi hâlâ meblağ-ı mezbûr on dört guruşu mezbûrûn bana def‘ ü teslîm ben-dahi yedlerinden bi’t-tamam ve’l-kemâl ahz ü kabz eylediğimden sonra ben mezbûrûn Abdullah ve Âişe ve Fâtıma’nın zimmetlerini cemî‘ de‘âvî ve mutâlebât ve eymân ve muhâsamâtdan ibrâ ve ıskāt edip onlar dahi cemî‘ de‘âvî ve mutâlebât ve eymâ[n ve] muhâsamâtdan benim zimmetimi ibrâ ve ıskāt eylediler dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: el-Hâc Mustafa b. Mehmed, Ömer Efendi el-müezzin, Mustafa b. Abdullah, Mehmed Çelebi b. Haydar, Ahmed Çelebi b. Piyale.