Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 310 Hüküm no: 279 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kaytas İbrahim Ağa b. Abdullah’ın, karısı Emine Hatun’a hayatta iken ödemediği mehrin terekesinden ödenmesi Mahmiye-i İstanbul’da Kapıağası Mahallesi ahâlîsinden olup bundan akdem Mısr-ı Kāhire’de vefât eden Kapıcıbaşı Kaytas İbrahim Ağa b. Abdullah’ın verâseti zevce-i metrûkesi Emine bt. Derviş nâm hatun ile sulbî sagīr oğlu Mehmed’e münhasıra olduğu şer‘an sâbit ve zâhir oldukdan sonra mezbûre Emine Hatun tarafından husûs-ı âti’l-beyâna vekîl olduğu mezbûre Emine Hatun’un zâtını ma‘rifet-i şer‘iye ile ârifân Ali Bey b. Abdullah ve Şahin b. Abdullah nâm kimesneler şehâdetleri ile şer‘an sâbit olan Ali Ağa b. Abdurrahman nâm kimesne meclis-i şer‘-i hatîr-i lâzımü’t-tevkīrde sagīr-i mezbûr Mehmed’in tesviye-i emrine kıbel-i şer‘den mansûb vasîsi olmağla tereke-i müteveffâ-yı mezbûra bi’l-vesâye vâzı‘u’l-yed olan Mehmed Efendi b. Davud nâm kimesne mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Emine Hatun bin yetmiş altı senesinde nefsini müteveffâ-yı mezbûr Kaytas İbrahim Ağa’ya inkâh ve tezvîc eylediğinde altmış bin akçe mehr-i müeccel üzerine huzûr-ı Müslimînde inkâh ve tezvîc mezbûr Kaytas İbrahim Ağa dahi tezevvüc ve kabûl edip meblağ-ı mezbûru zevcesi mezbûre Emine Hatun’a kable’l-edâ vefât edip meblağ-ı mezbûr altmış bin akçe zimmetinde kalmağın hâlâ vasîyy-i mezbûra suâl olunup meblağ-ı mezbûru tereke-i müteveffâ-yı mezbûrdan müvekkilem için bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda [86b] udûl-i ahrâr-ı ricâl-i Müslimînden olup zikrolunan Kapıağası Mahallesi sükkânından Hasan Bey b. Hüseyin ve İbrahim Bey b. Mustafa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka bin yetmiş altı senesinde müvekkile-i mezbûre Emine Hatun nefsini mezbûr Kaytas İbrahim Ağa’ya inkâh ve tezvîc eylediğinde altmış bin akçe mehr-i müeccel üzerine inkâh ve tezvîc mezbûr Kaytas İbrahim Ağa dahi bizim huzûrumuzda tezevvüc ve kabûl eyledi biz bu husûsa bu vech üzre şâhidleriz şehâdet dahi ederiz deyü her biri edâ-yı şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mezbûre Emine Hatun muhadderâtdan olmağla tahlîf için savb-ı şer‘den irsâl olunan Mehmed Efendi b. Mustafa müvekkile-i mezbûrenin zikrolunan Kapıağası Mahallesi’nde vâki‘ sâkine olduğu menziline varıp huzûr-ı Müslimînde akd-i meclis-i şer‘-i mübîn edip mezbûre Emine Hatun’un zâtını ma‘rifet-i şer‘iye ile ârifân mahalle-i mezbûre sükkânından Ali Ağa b. Abdülhalil ve diğer Ali Ağa b. Abdullah nâm kimesneler ve Hadîce bt. Abdullah ve Sâliha bt. Abdurrahman nâm hatunlar ta‘rîfleriyle mu‘arrefe olmağla zevci müteveffâ-yı mezbûr zimmetinde mütekarrir ve ma‘kūdün-aleyh mehr-i müecceli olan meblağ-ı mezbûr altmış bin akçeyi zevci müteveffâ-yı mezbûrdan küllen ve ba‘zan ahz ü istifâ ya hîbe ya âhara havâle ya turûk-ı şer‘iyeden bir tarîkle zimmetini ibrâ etmediğine mezbûre Emine Hatun’a yemîn teklîf eylediğinde ol dahi alâ-vefki’l-mesûl yemîn billâhi’l-aliyyü’l-a‘lâ etdiğini mezbûr Mehmed Efendi mahâllinde tahrîr ba‘dehû ma‘an irsâl olunan İbrahim Çelebi b. Mahmud ile meclis-i şer‘a gelip alâ-vukū‘ihî inhâ ve takrîr etmeğin mûcebince meblağ-ı mezbûr altmış bin akçeyi tereke-i müteveffâ-yı mezbûrdan vekîl-i mezbûra edâ ve teslîme vasîyy-i mezbûr Mehmed Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’l-hâmis aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: el-Hâc Kemâleddin Kethudâ-yı Hazret-i Efendi, Çukadâr Hasan Beşe, Musa Efendi Rûznâmçe, Ahmed Çelebi b. Piyale, Mehmed Çelebi b. Haydar.