Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 311 Hüküm no: 280 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in vârisi olmadan vefat eden Mehmed Efendi b. Mustafa’nın varisi olduğunu ispatladığı Fi’l-asl mahmiye-i İstanbul’da Lütf[î] Paşa Câmi‘-i Şerîfi kurbünde Defterdâr Ahmed Çelebi Mahallesi ahâlîsinden olup işbu sene-i mübârekede tarîk-ı hâcc-ı şerîfde vefât eden hâssa etibbâdan Mehmed Efendi b. Mustafa nâm kimesnenin babasının li-ebeveyn karındaşı oğlu ve min-ciheti’l-usûbeti’n-nesebiye hasren vârisi olduğunu iddi‘â eden Mehmed b. Ahmed nâm kimesne meclis-i şer‘-i şerîf-i enverde hâlâ mahmiye-i mezbûrede beytü’l-mâl-i hâssa emîni olup bilâ-vâris vefât edenlerin terekelerini kabza me’mûr olmağla müteveffâ-yı mezbûr Mehmed Efendi’nin vâris-i ma‘rûfu olmamak zu‘muyla terekesine bi’l-emâne vâzı‘u’l-yed olan Ömer Ağa b. Osman mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi’nin babası merkūm Mustafa ile benim babam mezkûr Ahmed li-ebeveyn karındaşlar olup babaları ismi Hasan ve vâlideleri ismi Âişe bt. Süleyman ve cedleri ismi İvaz ve maskat-ı re’sleri zikri mürûr eden Defterdâr Ahmed Çelebi Mahallesi’dir müteveffâ-yı mezbûr Mehmed Efendi’nin verâseti ber-vech-i muharrer min-ciheti’l-usûbeti’n-nesebiye bana münhasıra olup benden gayrı vârisi ve terekesine müstahakk-ı âhar yok iken merkūm Ömer Ağa müteveffâ-yı mezbûr Mehmed Efendi’nin vâris-i ma‘rûfu olmamak zu‘muyla terekesine bi’l-emâne vâzı‘u’l-yed olmağın hâlâ suâl olunup tereke-i müteveffâ-yı mezbûru bana teslîme mezbûr Ömer Ağa’ya tenbîh olunmak matlûbumdur [dedikde] gıbbe’s-suâl merkūm Ömer Ağa cevâbında tereke-i müteveffâ-yı mezbûra ber-vech-i muharrer bi’l-emâne vâzı‘u’l-yed olduğunu ikrâr lâkin müdde‘î-i mezbûr Mehmed’in vech-i meşrûh üzre verâsetini inkâr edicek müdde‘î-i mezbûr Mehmed’den müdde‘âsını mübeyyine beyyine taleb olundukda udûl-i Müslimînden olup mahmiye-i mezbûrede Mi‘mâr Sinan Mahallesi sükkânından Ömer Efendi b. Osman ve Sarrâc Mehmed b. İsmail nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka zikrolunan Defterdâr Ahmed Çelebi Mahallesi ahâlîsinden olup işbu sene-i mübârekede tarîk-ı hâcc-ı şerîfde vefât eden hâssa etibbâdan merkūm Mehmed Efendi b. Mustafa nâm kimesnenin babası mezkûr Mustafa ile işbu müdde‘î-i mezbûr Mehmed’in babası merkūm Ahmed li-ebeveyn karındaşlar olup babaları ismi mezkûr Hasan ve vâlideleri ismi mezkûre Âişe bt. Süleyman ve cedleri ismi mesfûr İvaz ve maskat-ı re’sleri zikri mürûr eden Defterdâr Ahmed Çelebi Mahallesi’dir müteveffâ-yı mezbûr Mehmed Efendi’nin verâseti ber-vech-i muharrer min-ciheti’l-usûbeti’n-nesebiye müdde‘î-i mezbûr Mehmed’e münhasıradır ve gayrı vârisi ve terekesine müstahakk-ı âhar olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde [87a] şâhidân-ı mezkûrânı mahâllinde ta‘dîl ve tezkiye için savb-ı şer‘-i kavîmden irsâl olunan Abdullah Efendi b. Abdurrahman zikri mürûr eden Mi‘mâr Sinan Mahallesi’ne varıp ahâlîsinden İbrahim b. Abdullah ve Ali Beşe b. Şa‘ban ve Ali Çelebi b. İlyas ve Hüseyin Beşe b. Abdullah ve Mehmed Beşe b. Musa ve Hüseyin Beşe b. Bilal ve Mustafa b. Abdullah ve Osman b. Ali ve İbrahim Beşe b. Abdullah ve Ahmed b. Ramazan nâm kimesnelerden şâhidân-ı mezbûrân Ömer Efendi ve Sarrâc Mehmed’in keyfiyet-i hâllerini istihbâr etdikde mezbûrân Ömer Efendi ve Sarrâc Mehmed’den her biri adl velev aleynâ makbûlü’ş-şehâdelerdir deyü her biri haber vermeğin vâki‘ hâli mezbûr Abdullah Efendi mahâllinde ketb ve terkīm edip ba‘dehû cânib-i şer‘den ma‘an irsâl olunan Abdülhalil Efendi b. İsmail ile meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle olmağın mûcebiyle müdde‘î-i mezbûrun sübût-ı verâsetine ba‘de’l-hükm tereke-i müteveffâ-yı mezbûru müdde‘î-i mezbûr Mehmed’e teslîme emîn-i mezbûr Ömer Ağa’ya tenbîh olunup mâ-vaka‘a bi’t-taleb ketb olundu. Fî 17 min-şehri Rebî‘ülevvel sene 1099 [1091]. Şuhûdü’l-hâl: Osman Çelebi b. Ali, Muslı Bey b. Abdullah, İbrahim Bey b. Mehmed, Yusuf Bey b. Mehmed, Abdülhalim? Efendi b. İsmail, Mehmed Çelebi b. Haydar.