Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 314 Hüküm no: 282 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tovraşko v. İstrozen’in evini eski Anadolu Kazaskeri Mustafa Efendi’ye sattığı Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet mahmiye-i İstanbul’da Tevkī‘î Cafer Çelebi Mahallesi’nde vâki‘ sâbıkā şeyhülislâm ve müfti’l-enâm olan fazîletli Bursevî Mehmed Efendi hazretlerinin sa‘âdethânelerine varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahmiye-i mezbûrede Tahtaminâre Mahallesi’nde sâkin Tovraşko v. İstrozen zimmî meclis-i ma‘kūd-ı mezbûrda işbu kitâb-ı sıhhat-nisâbın sahibi olup sâbıkā Anadolu Kādıaskeri olan a‘lemü’l-ulemâi’l-izâm efdalü’l-fudalâi’l-fihâm yenbû‘u’l-fezâil ve’l-meâli metbû‘i’l-efâzıl ve’l-e‘âlî alemü’l-ilm ve’l-hüdâ menârü’l-fazl ve’t-tekā sa‘âdetli Mustafa Efendi hazretlerinin kethudâları ve taraf-ı bâhirü’ş-şereflerinden husûs-ı âti’l-beyâna vekîl olduğu Şeyhzâde İbrahim Efendi b. Muslihiddin ve Çukadâr el-Hâc Mehmed b. ( ) nâm kimesneler şehâdetleri ile şer‘an sâbit olan el-Hâc İsmail b. Ali nâm kimesne mahzarında bi-tav‘ihiikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup zikrolunan Tahtaminâre Mahallesi’nde vâki‘ bir tarafdan müşârün-ileyh hazretlerinin vakıfları olup Eşekçi Kaben nâm zimmî tasarrufunda olan menzil ve bir tarafdan Eflak sarayı ve bir tarafdan Yorgaki nâm zimmî menzili ve bir tarafdan tarîk-ı âm ile mahdûd olup fevkānî beş bâb odayı ve iki sofayı ve bir matbahı ve tahtânî iki bâb odayı ve bir kileri ve bir ahırı ve bir zîr-i zemîni ve bir su kuyusunu ve havluyu ve eşcâr-ı müsmire bahçeyi müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı kat‘î ile bin beş yüz esedî guruşa vekîl-i mezbûr el-Hâc İsmail’e bey‘ ve teslîm ol dahi müvekkilleri müşârün-ileyh hazretleri için ber-vech-i muharrer iştirâ ve tesellüm eylediğinden sonra semeni olan meblağ-ı mezbûr bin beş yüz esedî guruşu işbu meclisde vekîl-i mezbûr el-Hâc İsmail yedinden tamamen ahz ü kabz eyledim min-ba‘d menzil-i mahdûd-ı mezbûrda kat‘a alâka ve medhalim kalmayıp müşârün-ileyh hazretlerinin mülk-i müşterâları ve hakk-ı sırfları olmuşdur keyfe mâ yeşâ’ ve yahtâr mutasarrıf olsunlar dedikde gıbbe’t-tasdîkı’ş-şer‘î mahrûse-i Galata’da Hüseyin Ağa Mahallesi’nde sâkin cevâhirci Drako v. Laska ve zikrolunan Tahtaminâre Mahallesi’nde sâkin Aleksandıra v. Panaloga ve Panayot v. Anderya nâm zimmîler meclis-i mezbûrda vekîl-i merkūm mahzarında her biri derk-i menzil-i mezbûra emir ve kabûlü hâviye kefâlet-i sahîha-i şer‘iye ile kefîl olduk dediklerini mevlânâ-yı mezbûr mahâllinde tahrîr ba‘dehû ma‘an irsâl olunan Abdülfettah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Fahrü’l-müderrisîni’l-kirâm Mu[sa]zâde Mehmed Efendi, fahrü’l-müderrisîni’l-kirâm es-Seyyid Mahmud Efendi b. Eyüb, fahrü’l-müderrisîn Uşşâkīzâde Osman Efendi, Hasan Efendi b. Mustafa, Receb Ağa b. Ali, es-Seyyid Abdülaziz Efendi el-imâm, Halil Ağa b. Kasım, es-Seyyid Ahmed Efendi b. Abdullah Efendi.