Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 316 Hüküm no: 283 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Hasan’ın Ali b. Kasım’dan zorla aldığı at ve parayı ona geri vermesi Vilâyet-i Anadolu’da Diyarbekir Eyâleti’nde Çüngüş kazâsına tâbi‘ Çönke nâm karye ahâlîsinden Ali b. Kasım Dîvân-ı Hümâyûn-ı sa‘âdet-makrûnda ma‘kūd meclis-i şer‘-i şerîfde mahmiye-i İstanbul’da Akbıyık Mahallesi’nde sâkin olup hâlâ kapudan olan vezîr-i mükerrem ve muhterem Kaplan Mustafa Paşa hazretlerinin ağalarından Ahmed Bey b. Hasan mahzarında üzerine da‘vâ ve takrîr-i kelâm edip <> târih-i kitâbdan beş sene mukaddem paşa-yı müşârün-ileyh Diyarbekir vâlîsi iken mezbûr Ahmed Bey karye-i mezkûre ile civârında (...) (...) kazâ-i mezbûra tâbi‘ <> Âb-ı tâhir ve Aylos ve Karfeti ve Akseki ve Bikerme ve Uslu ve Elyosa nâm karyeler beyninde İbrahim nâm kimesne maktûl bulunmağla (...) paşa-yı müşârün-ileyh tarafından buyruldu ile kātili teftîşe me’mûrum deyü (...) (...) (...) zikrolunan kurâ ahâlîsinden ma‘lûmü’l-esâmî ve mahsûrü’l-eşhâs kimesnelerin cem‘ ve tahsîl ve bi-tarîkı’l-vedî‘a bana teslîm ben-dahi ahz ü kabz eylediğim <> altı yüz elli esedî guruş kıymetli bir re’s doru atı benden bi-gayr-ı hakkın cebren ahz ü kabz etmekle suâl olunup mârrü’z-zikr at mevcûd ise aynını müstehlek ise ba‘de’s-sübût kıymet-i şer‘iyesi ile meblağ-ı mezbûr 650 guruşun alıverilmesi matlûbumdur <> dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda medîne-i Diyarbekir’e tâbi‘ Çermik ahâlîsinden olup mahmiye-i İstanbul’da Sultân Mehmed Han Câmi‘-i Şerîfi kurbünde sâkin Mehmed b. Ali ve Mehmed Ağa Câmi‘-i Şerîfi kurbünde sâkin Çermikî Arslan Molla Murad nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Ahmed târih-i kitâbdan beş sene mukaddem paşa-yı müşârün-ileyh hazretleri Diyarbekir vâlîsi iken karye-i mezbûreye gelip karye-i mezbûreye karîb Çöke Âb-ı tâhir ve Aylos ve Karfeti ve Akseki ve Bikerme ve Uslu ve Elyos nâm karyeler beyninde İbrahim nâm kimesne maktûl <> bulunmağla ben paşa-yı müşârün-ileyh tarafından buyruldu ile kātili teftîşe me’mûrum deyü zikrolunan kurâya ahâlîsinden ma‘lûmü’l-esâmî ve mahsûrü’l-eşhâs kimesnelerin cem‘ ve tahsîl ve bi-tarîkı’l-vedî‘a müdde‘î-i mezbûra teslîm eyledikleri mârrü’z-zikr bir re’s at ile 650 guruşu bizim huzûrumuzda mezbûr Ali’den ahz ü kabz eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle mârrü’z-zikr at mevcûd ise aynını müstehlek ise ba‘de’s-sübût kıymet-i şer‘iyesi ile meblağ-ı mezbûr 650 guruşu müdde‘î-i mezbûra red ve teslîme mezbûr Ahmed Bey’e tenbîh birle olunup mâ-vaka‘a bi’t-taleb ketb olundu. Fî-evâhiri Saferü’l-hayr sene 1091. Şuhûdü’l-hâl: Osman Ağa Ser-muhzırân, el-Hâc Kemâleddin Ağa b. Müyesser, Ahmed Çelebi b. Abdurrahman, Mehmed Çelebi b. Haydar. Mühür