Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 317 Hüküm no: 284 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed b. Muslı’nın kölesi Ali b. Abdullah’ı azat ettiği Vilâyet-i Rumeli’nde Köstendil Sancağı’nda nefs-i kasaba-i Petriç’de sâkin el-Hâc Mehmed b. Muslı nâm kimesne tarafından zikri âtî i‘tâk ve tahrîri ikrâra vekîl olup yine kasaba-i mezbûre sâkinlerinden Mehmed Çelebi b. Hüseyin ve Osman Çelebi b. Abdi nâm kimesneler şehâdetleriyle şer‘an vekâleti sâbite olan Hasan Bey b. Hüseyin nâm kimesne meclis-i şer‘-i şerîf-i lâzımü’t-tevkīrde bi’l-vekâle ikrâr edip zikri âtî i‘tâkın sudûruna değin müvekkil-i mezbûrun yedinde ve taht-ı tasarrufunda mülkü ve rakīki olup müvekkil-i mezbûra rıkk-ı sâbıkını mu‘terif olan işbu orta boylu açık kaşlı elâ göz[lü] Habeşiyyü’l-asl hâfızu hâze’l-kitâb Ali b. Abdullah nâm abd-i memlûkünü hasbeten lillâhi’l-Meliki’l-Hallâk tahrîr ve i‘tâk ve sâir ahrâr-ı asliyyîn silkine ilhâk ve idrâc eyledi min-ba‘d mezbûr Ali’nin üzerinde hakk-ı velâdan gayrı hakkı bâkī kalmadı dedikde mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ali Beşe el-kassab, Mustafa Beşe Teberdâr, Serveroğlu Hüseyin Beşe, el-Hâc Ali Çelebi b. ( ), Ahmed Çelebi b. Piyale, Mehmed Çelebi b. Haydar, Mehmed Efendi Kâtib.