Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 317 Hüküm no: 285 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdurrahman’ın mehrinin büyük bir kısmını kocası Ali b. Mustafa’ya hîbe ettiği Mahmiye-i İstanbul’da Karabaş Mahallesi sâkinelerinden olup zâtını ma‘rifet-i şer‘iye ile ârifân ola[n] Mehmed Efendi b. Hüseyin ve Kâtib Mehmed Çelebi b. Mustafa nâm kimesneler ta‘rîfleriyle mu‘arrefe olan Fâtıma bt. Abdurrahman nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Ali b. Mustafa mahzarında bi-tav‘ihâ ikrâr ve takrîr-i kelâm edip mezbûr Ali zevcim olup zimmetinde mütekarrir ve ma‘kūdün-aleyh olan üç bin akçe mehr-i müeccelimin iki bin sekiz yüz akçesini zevcim mezbûr Ali’ye hîbetü’d-deyni mimmen aleyhi’d-deynü [sahîhatün] fehvâsınca hîbe-i sahîha-i şer‘iye ile hîbe ol dahi ittihâb ve kabûl eyledi fîmâ-ba‘d mehr-i mezkûr üç bin akçeden zevcim mezbûr Ali zimmetinde ancak iki yüz akçe hakkım bâkī kalmışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Yusuf b. Halil, Hasan b. İbrahim, Mustafa b. Cafer, Mehmed b. Abdullah, Ahmed Çelebi b. Piyale.