Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 318 Hüküm no: 286 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mehmed Efendi’nin evini Ali Çelebi b. İbrahim’e sattığı Mahmiye-i İstanbul’da Cebecibaşı Mahallesi sükkânından fahrü’l-müderrisîni’l-kirâm eş-Şeyh Mehmed Efendi b. ( ) nâm kimesne meclis-i şer‘-i hatîr-i lâzımü’t-tevkīrde Anadolu Kādıaskeri muhzırlarından işbu bâ‘isü’l-kitâb el-Hâc Ali Çelebi b. İbrahim nâm kimesne mahzarında bi-tav‘ihiikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Cebecibaşı Mescid-i Şerîfi ve bir tarafdan Afîfe Hatun menzili ve bir tarafdan ba‘zan Emine Hatun ve ba‘zan Âişe Hatun menzilleri ve bir tarafdan tarîk-ı âm ile mahdûd olup fevkānî iki bâb odayı ve iki sagīr yan sofasını ve bir sagīr matbahı ve tahtında bir bâb odayı ve bir ahırı ve havluyu ve müşterek su kuyusunu müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-ı kat‘î ile üç yüz seksen beş esedî guruşa mezbûr el-Hâc Ali Çelebi’ye bey‘ ve teslîm ol dahi iştirâ ve tesellüm edip semeni olan meblağ-ı mezbûr üç yüz seksen beş guruşu mezbûr el-Hâc Ali Çelebi yedinden tamamen ahz ü kabz eyledim min-ba‘d menzil-i mahdûd-ı mezbûrda kat‘a alâka ve medhalim kalmayıp mezbûr el-Hâc Ali’nin mülk-i müşterâsı ve hakk-ı sırfı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ahmed Efendi b. Mehmed el-imâm, Mehmed Çelebi b. Ahmed, el-Hâc Ali el-Muhzır, el-Hâc Mustafa el-Muhzır, Mahmud Çelebi b. Eyüb Mukayyid, Mehmed Çelebi b. Ahmed Efendi.