Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 318 Hüküm no: 287 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Lapezlo v. Papa Yako’nun evini Sivasizâde Zaviyesi’nin para vakfına istiğlal yoluyla sattığı Mahmiye-i İstanbul hısnı ebvâbından Fener kapısı dâhilinde Abdi Subaşı Mahallesi’nde sâkin Papa Lapezlo v. Papa Yako nâm râhib meclis-i şer‘-i hatîr-i lâzımü’t-tevkīrde mahmiye-i mezbûrede Sivâsîzâde Zâviyesi’nin nukūd-ı mevkūfesine bi’l-fi‘il mütevellî olan bâ‘isü hâze’l-kitâb Ahmed Efendi b. Abdurrahman mahzarında bi-tav‘ihiikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Amred nâm Nasrâniye menzili ve bir tarafdan Saltana nâm Nasrâniye menzili ve bir tarafdan cidâr-ı hısn ve bir tarafdan tarîk-ı âm ile mahdûd olup fevkānî ve tahtânî büyût-ı adîdeyi ve havluyu ve bir su kuyusunu müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bi-tarîkı’l-istiğlâl yüz yedi dökme guruş ve elli sivilye guruş ve yüz üç esedî guruş cem‘an iki yüz altmış guruşa mütevellî-i mezbûra bey‘ ve teslîm ol dahi ber-vech-i muharrer iştirâ ve tesellüm edip semeni olan meblağ-ı mezbûr iki yüz altmış guruşu mütevellî-i mezbûr yedinde olan mal-ı vakf-ı mezbûrdan bana def‘ ve teslîm ben-dahi tamamen ahz ü kabz eylediğimden sonra mütevellî-i mezbûr menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan üç sene tamamına değin beher sene otuz dokuz guruş olmak üzre yüz on yedi esedî guruşa bana îcâr ve teslîm ben-dahi istîcâr ve tesellüm edip ücret-i mezkûre olan yüz on yedi esedî guruşdan vakf-ı mezbûra her üç ayda dokuz guruş ve üç rub‘ vermek üzre ta‘ahhüd eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mehmed Efendi b. Şeyh Osman Efendi el-imâm, Müderriszâde Mehmed Ali b. Mehmed, Mehmed Efendi b. Mustafa, Mehmed Bey b. Abdullah el-Cündî, el-Hâc Musa [b.] Abdülmennan.