Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 319 Hüküm no: 288 Orijinal metin no: [88b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ebubekir’in İbrahim Bey b. Hasan’dan borcuna mahsuben aldığı keçi ve öküzleri ona teslim etmesi Vilâyet-i Anadolu’da Kangırı Sancağı’nda Kal‘acık kasabası sükkânından olup sâbıkā Bîretü’l-fırât beği olan işbu bâ‘isü’l-kitâb İbrahim Bey b. Hasan meclis-i şer‘-i şerîf-i lâzımü’t-tevkīrde hâssa helvâyîlerden İbrahim b. Ebîbekir nâm kimesne muvâcehesinde üzerine da‘vâ ve takrîr-i kelâm edip mezbûr İbrahim’e cihet-i karz-ı şer‘îden sekiz yüz esedî guruş ile yedinden müşterâ ve makbûz cins ve vasfı beynimizde ma‘lûme emti‘a-i mütenevvi‘a semenlerinden dahi iki yüz esedî guruş ki cem‘an bin esedî guruş deynim olmağla mezbûr İbrahim târih-i kitâbdan beş sene mukaddem Diyarbekir vâlîsi olan vezîr-i mükerrem Kaplan Mustafa Paşa hazretleri ile ben Nusaybin Azna[vur] Depesi nâm mahalle nüzûl eylediğimizde bana mülâkī olup meblağ-ı mezkûru taleb etdikde semenlerinden deyn-i mesfûrumu istifâ etmek üzre yedimde mülk ve hakkım olan her biri ikişer buçuk guruş kıymetli beş yüz seksen re’s erkeç ta‘bîr olunur tiftik keçisi ve her re’si on beşer guruş kıymetli otuz re’s beledî ta‘bîr olunur öküzlerimi add ve teslîm ol dahi ber-vech-i muharrer ahz ü kabz ve tesellüm etmiş-iken târih-i kitâbdan altı ay mukaddem bende bin altı yüz elli esedî guruşu olmak üzre Üsküdar kādısı İsmailzâde Mustafa Efendi b. Mehmed kıbelinden nakletdirdip gāib ani’l-meclis Hasan b. Hüseyin nâm kimesneyi meblağ-ı mezbûru benden taleb ve ahza tevkîl edip ol dahi mübâşir ile üzerime gelip bi-gayr-ı hakkın bin altı yüz elli esedî guruşumu ahz ü kabz etmeğin hâlâ suâl olunup mârrü’z-zikr beş yüz seksen re’s keçi ve otuz re’s beledî öküz mevcûd ise aynlarını müstehlek ise ba‘de’s-sübût kıymet-i şer‘iye-[89a]-lerini bana red ve teslîme mezbûr İbrahim’e tenbîh olunmak matlûbumdur dedikde gıbbe’s-suâl mezbûr İbrahim cevâbında müdde‘î-i mezbûr zimmetinde cihet-i karz-ı şer‘îden bin esedî guruş ve metâ‘ bahâsından altı yüz elli esedî guruş ki cem‘an bin altı yüz elli esedî guruşu olduğunu mûmâ-ileyh Mustafa Efendi huzûrunda ba‘de’l-isbât nakil hücceti etdirdip merkūm Hasan’ı ahz ü kabza tevkîl ve irsâlini ikrâr lâkin târih-i mezkûrda bâlâda tafsîl olunan minvâl üzre beş yüz seksen keçi ve otuz beledî öküzleri kabzını inkâr edicek müdde‘î-i mezbûrdan müdde‘âsına beyyine taleb olundukda fi’l-asl Diyarbekir’de Hacı Osmanoğlu Mahallesi ahâlîsinden olup bi-tarîkı’l-müsâfere mahrûse-i Üsküdar’da İskele hânında sâkin udûl-i Müslimînden Şahin b. Hüseyin ve Dergâh-ı âlî yeniçerilerinin yetmiş cemâ‘atine mahsûs oda ahâlîsinden Ahmed Beşe b. Mehmed li-ecli’ş-şehâde meclis-i şer‘a hâzırân olup [isre]’l-istişhâd fi’l-vâki‘ işbu mezkûr İbrahim târih-i kitâbdan beş sene mukaddem paşa-yı müşârün-ileyh hazretlerinin nüzûl etdikleri Nusaybin kurbünde Aznavur Depesi nâm mahâlde mezbûr İbrahim Bey’e mülâkī olup hakkını taleb etdikde merkūm İbrahim Bey dahi semenlerinden deyn-i mesfûru istifâ etmek üzre yedinde mülk ve hakkı olan beş yüz seksen re’s erkeç ta‘bîr olunur tiftik keçisi ile otuz re’s beledî ta‘bîr olunur öküzlerini bizim huzûrumuzda add ve dâyini işbu mezbûr İbrahim’e teslîm ol dahi ber-vech-i muharrer ahz ü kabz ve tesellüm eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eyledikleri[nde] şâhidân-ı mezkûrânı ta‘dîl ve tezkiye için kıbel-i şer‘den irsâl olunan Mustafa Efendi b. Derviş Mehmed Efendi mahrûse-i Üsküdar’a varıp Vâlide Sultân-ı Atîk Câmi‘-i Şerîfi kurbünde sâkin Mehmed Ağa b. Osman ve Hüseyin Beşe b. Mehmed ve İbrahim b. Abdullah’[dan] mezbûrân Şahin ve Ahmed Beşe’nin keyfiyet-i hâllerini suâl etdikde mezbûrânın adl ve makbûlü’ş-şehâde olduklarını her biri haber vermeğin vâki‘ hâli mezbûr Mustafa Efendi mahâllinde ketb ve terkīm edip ba‘dehû ma‘an irsâl olunan Mehmed b. Haydar [ile] meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle olmağın mûcebiyle mârrü’z-zikr beş yüz seksen re’s keçi ve otuz re’s öküzlerin mevcûd ise aynlarını müstehlek ise ba‘de’s-sübût kıymet-i şer‘iyelerini müdde‘î-i mezbûra red ve teslîme mezbûr İbrahim’e tenbîh olunup mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ahmed Efendi b. Abdülkadir, Mehmed Çelebi b. Haydar, Ahmed Çelebi b. Hüseyin, es-Seyyid Mehmed Çelebi b. Receb, Musa Efendi b. Receb.