Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 321 Hüküm no: 289 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden ve terekesine beytülmal tarafından el konulan Mustafa Paşa’nın terekesinin kardeşi Ali Paşa’ya teslim edilmesi Sâbıkā Şehrizol vâlîsi olan emirü’l-ümerâi’l-kirâm Ali Paşa b. Bâyezid tarafından husûs-ı âti’l-beyâna vekîl olup mahmiye-i İstanbul’da Çırakçı Mahallesi’nde sâkin Süleyman b. Mehmed ve İshak b. Ali şehâdetleri ile şer‘an vekâleti sâbite olan işbu bâ‘isü’l-kitâb es-Seyyid Ali b. Abdurrahman meclis-i şer‘-i hatîr-i lâzımü’t-tevkīrde bi’l-fi‘il şıkk-ı evvel defterdârı olmağla zikri âtî terekeye vaz‘-ı yed eden câmi‘ü’l-emvâli’s-Sultâniye olan âmirü’l-hazâini’l-Osmâniye zü’l-kadri’r-refî‘ ve’l-izzi’l-menî‘ Hasan Efendi tarafından husûs-ı âti’l-beyâna vekîl olup bimâ-hüve nehcü’s-sübût şer‘an vekâleti sâbite olan Ömer Ağa b. Osman mahzarında bi’l-vekâle üzerine da‘vâ ve takrîr-i kelâm edip mahmiye-i mezbûrede [mezbûre] hısnı ebvâbından Balat kapı[sı] dâhilinde sâkin Yusuf Ağa b. Abdülmennan nâm kimesnenin menzilinde müsâferet vechi üzre sâkin iken hâlâ vefât edip terekesi müvekkil-i müşârün-ileyh yedinde olan Gürcü Mehmed b. Abdullah Azak vâlîsi iken bundan akdem maktûlen vefât eden Mustafa Paşa’nın me’zûn fi’t-ticâre abd-i memlûkü [ve] mezbûr Ali Paşa müteveffâ-yı mezkûr Mustafa Paşa ile li-eb karındaşlar olup babaları ismi Bâyezid ve maskat-ı re’sleri Vilâyet-i Anadolu’da Erzurum’a tâbi‘ (...) Ahihan? nâm karye [89b] olup mezbûr Mustafa Paşa’nın verâseti halîle-i muhteremeleri devletlü sa‘âdetlü Beyhan Sultân dâmet iffetuhâ ile karındaşı mezbûr Ali Paşa’ya münhasıra ve sultân-ı müşârün-ileyhâ hazretleri mehr ve hissesini sâir terekeden bi-tarîkı’t-tehârüc ahz edip sâir terekesi ile mezbûr Gürcü Mehmed ve yedinde olan eşyâ müvekkilim mezbûra ta‘yîn ve tahsîs olunmuş iken hâlâ fevt oldukda mezbûr Gürcü Mehmed hür olup zâhirde vâris-i ma‘rûfu olmamak vechi üzre yedinde olan terekeye vaz‘-ı yed eder suâl olunup müvekkil-i müşârün-ileyh kasr-ı yed ve müvekkilime teslîm olunmak matlûbumdur dedikde gıbbe’s-suâl mezbûr Ömer Ağa cevâbında müvekkil-i müşârün-ileyhin mezbûr Mehmed’in yedinde bulunan terekeye bâlâda tafsîl olunan minvâl üzre vaz‘-ı yedini ikrâr lâkin müşârün-ileyh Ali Paşa’nın ber-vech-i meşrûh verâsetini inkâr edicek müdde‘î-i mezbûrdan müdde‘âsına beyyine taleb olundukda mahmiye-i mezbûrede Akbıyık mahalllesinde sâkin udûl-i ahrâr-ı ricâl-i Müslimînden el-Hâc Mehmed b. Mustafa ve Dâye Hatun Mahallesi’nde sâkin el-Hâc Bayram b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Gürcü Mehmed b. Abdullah Azak vâlîsi iken bundan akdem maktûlen vefât eden Mustafa Paşa’nın me’zûn fi’t-ticâre abd-i memlûkü ve mezbûr Ali Paşa müteveffâ-yı mezkûr Mustafa Paşa ile li-eb karındaşlar olup babaları ismi Bâyezid ve maskat-ı re’sleri Beyhan Sultân dâmet ismetühâ ile karındaşı mezbûr Ali Paşa’ya münhasıra [ve] sultân-ı müşârün-ileyhâ hazretleri mehr ve hissesini sâir terekeden bi-tarîkı’t-tehârüc ahz edip sâir terekesi ile mezbûr Gürcü Mehmed ve yedinde olan eşyâ mezbûr Ali Paşa’ya ta‘yîn ve tahsîs olunmuşdur mezbûr Gürcü Mehmed ve yedinde mevcûde olan eşyâ müvekkil-i mezbûr Ali Paşa’nın mülk-i mevrûsu olup vâris-i âhar ve terekesine gayrı müstahık ma‘lûmumuz değildir biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Süleyman b. Mehmed, İshak b. Ali, el-Hâc Mehmed b. Mustafa, Bayram Bey b. Abdullah, Mehmed Çelebi b. Haydar.