Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 322 Hüküm no: 290 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’den intikal eden han odasının merhumun küçük çocukları için satılıp bedelinin istirbah olunması Mahmiye-i İstanbul hısnı ebvâbından Unkapanı kapısı dâhilinde Haraççı Muhyiddin Mahallesi’nde sâkin iken bundan akdem vefât eden el-Hâc Mehmed’in evlâd-ı sıgārı Emine ve Rukiye ve Emetullah’ın ceddeleri ve tesviye-i umûrlarına kıbel-i şer‘-i kavîmden mansûbe vasîleri olan işbu bâ‘isetü’l-kitâb Râbia bt. Mustafa nâm hatun meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip sıgār-ı mezbûrûnun babaları müteveffâ-yı mezbûr el-Hâc Mehmed’in mahmiye-i mezbûrede Bodrum hânında vâki‘ Ayasofya-i Kebîr vakfına yevmî iki akçe icâresi olan bir bâb tahtânî odasından gayrı asla muhallefâtı olmayıp zikrolunan oda dahi îcâr olunsa dahli harcına vefâ etmedikden mâ‘adâ sıgār-ı mezbûrûnun nafaka ve kisveye eşedd-i ihtiyâc ile muhtâcları olup hakīkat-i hâl mahalle-i mezbûre ahâlîsinden işbu hâzırûn bi’l-meclis Müezzin Osman Halîfe b. Ramazan ve Mehmed Beşe b. Mustafa ve Şahin Odabaşı b. Abdullah ve el-Hâc Rıdvan b. Abdullah ve el-Hâc Ahmed b. İshak ve Mehmed Beşe [b.] Habib ve İsmail Çelebi b. Süleyman ve Osman Beşe b. Yusuf ve Mehmed Efendi b. Mustafa ve Hüseyin Beşe b. Ahmed ve Ahmed Beşe b. Abdullah nâm kimesnelerden suâl olunup zikrolunan oda zarûret-i nafaka ve kisve-i sıgār-ı mezbûrûn için bedel-i misli ile âhara ferâğ ve tefvîze bi’l-vesâye bana taraf-ı şer‘-i kavîmden izin verip yedime hüccet verilmek matlûbumdur dedikde hakīkat-i hâl mezbûrûndan suâl olundukda her biri müteveffâ-yı mezbûrun hân-ı mezbûrda vâki‘ zikrolunan odasından gayrı muhallefâtı olmayıp zikrolunan oda îcâr olunsa dahli harcına vefâ eylemediğinden mâ‘adâ sıgār-ı mezbûrûn nafaka ve kisveye [eşedd-i] ihtiyâcla muhtâclar olup zikrolunan oda bedel-i misli ile âhara tefvîz olunup bedeli istirbâh olunmak her vechile sıgār-ı mezbûrûn hakkında enfa‘ ve evlâdır deyü her biri alâ-tarîkı’ş-şehâde haber vermeleriyle zikrolunan [oda] bedel-i misli âhara ferâğ ve tefvîz olunmak üzre vasîyy-i mezbûre Râbia Hatun’a izin birle mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Halil Efendi el-kâtib, Ahmed Çelebi b. Piyale, Mehmed Bey b. Cafer.