Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 323 Hüküm no: 291 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şa‘ban b. Abdullah’ın vârisleriyle Abdülkadir Efendi b. Osman’ın alacak davasında sulh oldukları Medîne-i Hazret-i Ebî Eyyûb-i Ensârî aleyhi Rahmeti’l-Bârî’de Topçular’da Süleyman Subaşı Mahallesi’nde sâkin iken bundan akdem vefât eden Şa‘ban b. Abdullah’ın verâseti zevce-i metrûkesi Âişe bt. Murad ile li-ebeveyn karındaşı Durmuş nâm kimesneye münhasıra olduğu şer‘an zâhir ve mütebeyyin oldukdan sonra mezbûr Durmuş asâleten ve mezbûre Âişe tarafından zikri âtî sulh ve ibrâya vekîl-i müsecceli olan Ali Hoca b. Mehmed vekâleten meclis-i şer‘-i hatîrde mahalle-i mezbûre imâmı işbu râfi‘u’l-kitâb Abdülkadir Efendi b. Osman mahzarında her biri ikrâr ve takrîr-i kelâm edip mezbûr Abdülkadir Efendi’nin müteveffâ-yı mezbûr zimmetinde cihet-i şer‘iyeden elli altı esedî guruş hakkı olmağın meblağ-ı mezbûru şühûd-ı udûl ile ba‘de’l-isbât tereke-i müteveffâ-yı mezbûrdan mezbûr Abdülkadir Efendi’ye edâya bize tenbîh olundukdan sonra meblağ-ı mezbûr mukābelesinde müteveffâ-yı mezbûrun terekesinden mezbûr Abdülkadir Efendi’ye yirmi üç araba otluk def‘ ve teslîm eylediğimizde ol dahi ba‘de’l-kabûl ahz ü tesellüm ve kabz eylediğinden sonra ziyâde yedi araba otluk dahi ahz ü kabz etmekle hâlâ zikrolunan yedi araba otluğu mezbûr Abdülkadir Efendi’den asâleten ve vekâleten taleb ve da‘vâ eylediğimizde beynimizde nizâ‘-ı küllî vâki‘ olmağın vesâtet-i muslihîn ile mezbûr Abdülkadir Efendi bi-tarîkı’s-sulh bize altı kıt‘a esedî guruş def‘ ü teslîm biz dahi tamamen ahz ü kabz edip ziyâde-i mezbûreye müte‘allika cemî‘ da‘vâdan mezbûr Abdülkadir Efendi’nin zimmetini asâlet ve vekâletimiz hasebiyle ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: el-Hâc Ahmed b. Abdullah, Musa Bey b. Mehmed, el-Hâc Mehmed b. Abdullah, Osman Efendi el-kâtib, Ahmed Çelebi b. Piyale.