Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 323 Hüküm no: 292 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Zülfikar’ın evini karısı Kaya bt. Mehmed’e sattığı Mahmiye-i İstanbul’da Derviş Ali Mahallesi’nde sâkin Mehmed Çelebi b. Zülfikar nâm kimesne meclis-i şer‘-i hatîrde zevcesi işbu bâ‘isetü’l-kitâb Kaya bt. Mehmed tarafından husûs-ı âti’l-beyâna vekîl olup zât-ı mezbûreyi ma‘rifet-i şer‘iye ile ârifân olan Mehmed Çelebi b. Mahmud ve Mustafa Beşe b. Mehmed şehâdetleriyle şer‘an vekâleti sâbite olan Veli Ağa b. Hasan mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan Durmuş mülkü ve iki tarafdan âhar mülklerim ve bir tarafdan tarîk-ı âm ile mahdûd fevkānî ve tahtânî iki bâb odaları ve dehlizli bir yer odasını ve bir mikdâr arsa-i hâliyeyi ve iki kenîfi müştemil mülk menzilimi cümle tevâbi‘ ve levâhıkı ile zevcem müvekkile-i mezbûreye yetmiş kıt‘a esedî guruşa tarafeynden îcâb ve kabûlü hâvî bey‘-ı kat‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr yetmiş esedî guruşu müvekkile-i mezbûre yedinden tamamen ahz ü kabz eyledim ba‘de’l-yevm menzil-i mahdûd-ı mezbûr zevcem müvekkile-i mezbûrenin mülk-i müşterâsıdır keyfe mâ teşâ’ ve tahtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mustafa Çelebi b. el-müezzin, Mehmed Halîfe b. Abdullah, İslam Efendi b. el-imâm, Ahmed Çelebi b. Abdullah, Monla Mehmed b. Abdullah, Şa‘ban Beşe b. Abdullah.