Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 324 Hüküm no: 293 Orijinal metin no: [90a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ebubekir b. Ömer’den küçük kızı Fâtıma’ya intikal eden dükkân hisselerinin satılıp bedelinin istirbah olunması Mahmiye-i İstanbul’da Muhtesib İskender Mahallesi’nde sâkin iken bundan akdem vefât eden el-Hâc Ebûbekir b. Ömer el-Yârî’nin verâseti sulbî kebîr oğlu Mustafa ile sulbiye kebîre kızları Neslihan ve [R]âşide ve Sâkine nâm hatunlara ve sulbiye [sagīre] kızı Fâtıma’ya münhasıra olduğu şer‘an zâhir ve müte‘ayyin oldukdan sonra sagīre-i mezbûrenin tesviye-i umûru için kıbel-i şer‘den mansûb vasîsi olan işbu bâ‘isü’l-kitâb el-Hâc Mehmed Efendi b. Hasan meclis-i şer‘-i şerîf-i enverde bi’l-vesâye ikrâr ve i‘tirâf edip Ayasofya-i Kebîr evkāfından icâreteyn-i ma‘lûmeteynli Saraçhâne dâhilinde biri mahzenli kebîr ve biri mahzensiz sagīr iki sarrâc dükkânı ve Kethudâ Canfeda Hatun vakfından kezâlik icâreteyn-i ma‘lûmeteynli Karagümrük kurbünde biri kalaycı ve biri pazarcı ve biri terzi sâkin olur üç dükkân müteveffâ-yı mezbûrun tasarrufunda olup ba‘de-vefâtihî intikāl-i âdî ile evlâd-ı mezkûrûna intikāl etmişidi lâkin sagīre-i mezbûreden mâ‘adâ kibâr zikrolunan dekâkînden hisselerin izn-i mütevellî ile âhara ferâğ etmekle sagīre-i mezbûrenin hissesi bi’l-külliye intifâ‘dan kalıp dâhili harcına vefâ etmemekle ânın dahi hissesi bedel-i misli ve izn-i mütevellî ile âhara ferâğ ve bedeli istirbâh olup terabbuhu ile sagīre-i mezbûre infâk olunmak her vechile hakkında enfa‘ ve evlâ olmağın vâki‘ hâl vukūfu olan Müslimînden istifsâr olup haberleri tahrîr ve savb-ı şer‘-i kavîmden bana izin verilmek matlûbumdur dedikde husûs-ı mezbûra vukūf-ı tâmmı olan yine ahâlî-i mahalle-i mezbûreden es-Seyyid Mehmed Efendi b. Mustafa el-imâm ve Ömer Efendi b. Mustafa ve Ali Beşe b. Veli ve İbrahim Çelebi b. Ahmed ve Hasan Çelebi b. Veli ve İbrahim Bey b. Hüseyin ve sâir mektûbü’l-esâmî Müslimîn fi’l-hakīka hâl bâlâda ketb ve terkīm olunan minvâl üzre olduğunu her biri haber vermeğin mûcebiyle dekâkîn-i mezkûreden sagīre-i mezbûrenin dahi hissesini bedel-i misli ve izn-i mütevellî ile âhara ferâğ ve bedelini istirbâh edip rıbhı ile sagīre-i mezbûreyi [90b] infâk ve iksâya savb-ı şer‘den vasîyy-i mezbûra izin verilip mâ-vaka‘a bi’t-taleb ketb olundu. Fi’l-yevmi’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ahmed Çelebi b. Abdurrahman, Hüseyin Efendi b. ( ), Mehmed Çelebi b. Haydar, Ebûbekir Efendi b. Abdi, Ahmed Çelebi b. Piyale.