Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 325 Hüküm no: 294 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muammer Hatun bt. Abdullah’ın kölesi Süleyman b. Abdullah’ı azat ettiği Mahmiye-i İstanbul’da Kirmasti Mahallesi sâkinelerinden Muammer Hatun bt. Abdullah’ın zevci ve tarafından ıtk-ı âti’z-zikri ikrâra vekîl olup mezbûrenin zâtını ma‘rifet-i şer‘iye ile ârifân Ahmed Çelebi b. Abdurrahman Efendi ve Abdullah b. Ahmed şehâdetleriyle şer‘an vekâleti sâbite olan Osman Çelebi b. Mehmed meclis-i şer‘-i şerîf-i enverde bi’l-vekâle ikrâr-ı tâm ve takrîr-i kelâm edip müvekkilem mezbûre Muammer Hatun kendüye rıkkını i‘tirâf eden işbu çatık kaşlı elâ gözlü orta boylu Çerkesiyyü’l-asl hâmilü hâze’l-kitâb Süleyman b. Abdullah nâm abd-i memlûkünü hasbeten lillâhi te‘âlâ ve haseneten li-rûhi Resûlihi’l-mu‘allâ mâlından tahrîr ve i‘tâk ve zîk-ı rıkkıyetden ıtlâk ve sâir ahrâr-ı asliyyîn silkine ilhâk ve idrâc eyledi fîmâ-ba‘d mevsûf-ı mezbûr Süleyman sâir ahrâr-ı asliyyîn gibi hür olup müvekkilem mezbûrenin üzerinde velâdan gayrı hakkı kalmadı dedikde mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ahmed Çelebi b. Piyale, Mehmed Çelebi b. Haydar, Hasan Çelebi b. ( ), Halil Çelebi b. ( ).