Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 325 Hüküm no: 295 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın arsasını Yahya Çelebi b. Mehmed’e hibe ettiği ve vasiyetini yerine getirmek üzere adı geçen Yahya Çelebi’yi vasî tayin ettiği Mahmiye-i İstanbul’da Kasım Ağa Mahallesi sâkinelerinden Âişe bt. Hasan nâm hatun tarafından husûs-ı âti’z-zikri ikrâra vekîl olup mezbûrenin zâtını ma‘rifet-i şer‘iye ile ârifân <> İbrahim Efendi b. Mahmud el-imâm ve el-Hâc Abdurrahman b. Mustafa şehâdetleri ile şer‘an vekâleti sâbite olan es-Seyyid Ali Çavuş b. Mustafa meclis-i şer‘-i şerîf-i enverde müvekkile-i mezbûrenin kız karındaşının oğlunun oğlu işbu râfi‘u’l-kitâb Yahya Çelebi b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Âişe silk-i mülkünde münselik olup mahalle-i mezbûrede vâki‘ bir tarafdan mezbûr Yahya Çelebi mülkü ve bir tarafdan mahalle-i mezbûre müezzinine meşrûta vakıf menzil ve bir tarafından Aynî Hatun menzili ve bir tarafından tarîk-ı âm ile mahdûd tûlen ve arzan bi-hesâb-ı terbî‘î altmış zirâ‘ mülk arsasını hîbe-i sahîha-i şer‘iye ile mezbûr Yahya Çelebi’ye hîbe ve temlîk ve teslîm edip ol dahi meclis-i hîbede ittihâb ve kabûl ve kabz eyledi fîmâ-ba‘d mârrü’z-zikr arsa mezbûr Yahya Çelebi’nin mülk-i mevhûbesi olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î yine vekîl-i mezbûr es-Seyyid Ali Çavuş meclis-i şer‘de merkūm Yahya Çelebi mahzarında i‘âde-i kelâm edip müvekkilem mezbûre Âişe eğer bi-emrillâhi te‘âlâ vefât edersem cemî‘ mâlımı kabz ve içinden mu‘tâd-ı muvahhidât üzre techîz ve tekfînim görüp bâkīsini vereseme îsâl ve teslîm eylesin deyü vasiyet ve ta‘yîn edip bu vasiyetini tenfîze mezbûr Yahya Çelebi’yi vasîyy-i muhtâr nasb ve ta‘yîn eyledi dedikde mezbûr Yahya Çelebi dahi vesâyet-i mezbûreyi kabûl ve merâsimini kemâ-yenbagī edâya ta‘ahhüd etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: es-Seyyid Cafer Efendi b. [Abdü]lkerim, Ali Beşe b. Hasan el-Haffâf, es-Seyyid Mehmed Çelebi b. Cafer, Halil Beşe b. el-Hâc Abdullah, Mustafa Beşe b. Halil.