Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 326 Hüküm no: 296 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın evini Ümmühani bt. Mehmed’e hibe ettiği Mahmiye-i İstanbul’da Kasım Ağa Mahallesi sâkinelerinden Âişe bt. Hasan nâm hatun tarafından husûs-ı âti’z-zikri ikrâra vekîl olup mezbûrenin zâtını ma‘rifet-i şer‘iye ile ârifân İbrahim Efendi b. Mahmud el-imâm ve el-Hâc Abdurrahman b. Mustafa şehâdetleriyle şer‘an vekâleti sâbite olan es-Seyyid Ali Çavuş b. Mustafa meclis-i şer‘-i şerîf-i enverde müvekkile-i mezbûrenin kız karındaşı kızı Ümmühani bt. Mehmed nâm hatun mahzarında bi’l-vekâle ikrâr ve takrîr-i kelâm edip müvekkile-i mezbûre Âişe silk-i mülkünde münselik olup mahalle-i mezbûrede vâki‘ bir tarafdan Halil Beşe mülkü ve bir tarafdan Yahya Beşe bahçesi ve bir tarafdan Neccâr Serabyon mülkü ve bir tarafdan bostan ile mahdûd bir bâb oda ve bir kiler ve bir su kuyusu ve bir müşterek âhar su kuyusu ve kuyu yolunu müştemil bir bâb mülk menzilini merkūme Ümmühani’ye hîbe-i sahîha-i şer‘iye ile hîbe [ve] temlîk ve teslîm ol dahi meclis-i hîbede ittihâb ve kabûl ve kabz eyledi fîmâ-ba‘d menzil-i mahdûd-ı mezkûr merkūme Ümmühani’nin mülk-i mevhûbesi olmuşdur müvekkilem mezbûrenin alâka ve medhali kalmadı keyfe mâ teşâ’ ve tahtâr mutasarrıfa olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: es-Sâbıkūn.