Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 327 Hüküm no: 297 Orijinal metin no: [90b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in Kenan Ağa b. Abdullah’tan haksız yere aldığı paraları ona teslim etmesi Mahmiye-i İstanbul’da Küçük Ayasofya’da Hüseyin Ağa Mahallesi’nde sâkin işbu râfi‘u’l-kitâb Kenan Ağa b. Abdullah saray-ı Hazret-i Sadr-ı a‘zamî’de ma‘kūd meclis-i şer‘-i şerîf-i enverde mahmiye-i mezbûrede Hocapaşa Mahallesi’nde sâkin Mustafa b. Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan on ay mukaddem ben Aydın Sancağı avârızı bedeli cem‘ine me’mûr ve mezkûr Mustafa Tire mütesellimi Mehmed Ağa nâm kimesnenin kethudâsı olmağla kasaba-i Nazilli’de sâkin gāib ani’l-meclis Ömer Efendi nâm kimesneyi bî-vech ba‘zı töhmet ile ithâm ve mezbûru habs edip ve yine kasaba-i mezkûre kurbünde Hacı Beğli nâm karye ahâlîsinden dahi ihzâr ve karyenizde kan olmuşdur deyü habs ve eziyet etmekle merkūm Ömer Efendi’nin halası için [91a] yedi yüz otuz esedî guruş ve karye-i mezbûre ahâlîsini halâs için yüz esedî ki min-haysü’l-mecmû‘ tahlîsleri için bi-gayr-ı hakkın sekiz yüz otuz esedî guruşumu ahz ü kabz etmişdir suâl olunup meblağ-ı mezbûru bana red ve teslîme mezbûr Mustafa’ya tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda yine kasaba-i Nazilli ahâlîsinden olup mahmiye-i mezbûrede Uzunçarşı’da Suluhan’da müsâferet vechi üzre sâkin udûl-i Müslimînden Mustafa b. Mehmed ve Soğukçeşme kurbünde sâkin Nazillili el-Hâc Mahmud b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka târih-i mezkûrda müdde‘î-i mezbûr Tire mütesellimi Mehmed Ağa’nın kethudâsı olmağla merkūm Ömer Efendi’yi bî-vech ba‘zı töhmet ile ithâm ve mezbûru habs edip ve yine kasaba-i mezkûre kurbünde Hacı Beğli nâm karye ahâlîsini dahi ihzâr ve karyenizde kan olmuşdur deyü habs ve eziyet etmekle merkūm Kenan Ağa’dan merkūm Ömer Efendi’nin halası için yedi yüz otuz esedî ve karye-i mezbûre ahâlîsini halâs için yüz esedî ki cem‘an sekiz yüz otuz esedî guruşu tahlîsleri için bi-gayr-ı hakkın bizim huzûrumuzda ahz ü kabz ve tesellüm eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı mezkûrânı ta‘dîl ve tezkiye için cânib-i şer‘-i kavîmden irsâl olunan Mustafa Efendi b. Abdülaziz hân-ı mezkûra varıp kasaba-i mezbûre ahâlîsinden Ömer Efendi b. Mehmed el-Kādî ve Ahmed Çelebi [b.] Mehmed ve Ali Bey b. el-Hâc Mustafa ve Himmet Bey b. Ali ve Ali Ağa b. Abdullah ve Osman Beşe b. Mustafa ve sâirlerinden şâhidân-ı merkūmânın hâllerin istikşâf etdikde mezbûrânın adl ve makbûlü’ş-şehâde olduklarını her biri haber vermeğin mezbûrân sırren ve alenen ta‘dîl ve tezkiye olunup vâki‘ hâli mezbûr Mustafa Efendi mahâllinde ketb ü terkīm edip ba‘dehû cânib-i şer‘den ma‘an irsâl olunan Mehmed Çelebi b. Ahmed ile meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle olmağla mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Umdetü’l-eşbâh el-Hâc Kemâleddin Ağa b. Müyesser, Musa Efendi b. Receb, Osman Ağa Muhzırbaşı, Mehmed Çelebi b. Haydar, Ahmed Çelebi b. Piyale.