Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 329 Hüküm no: 299 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdi Bey b. Osman’ın karısı Muammer bt. Abdullah ile erkek kardeşi Himmet arasındaki miras davasının sulh ile neticelendiği Mahmiye-i İstanbul’da Kirmasti Mahallesi’nde sâkin iken bundan akdem vefât eden Abdi Bey b. Osman’ın verâseti zevce-i menkûhası Muammer bt. Abdullah ile sulbiye sagīre kızları Rukiye ve Ümmühan ve Râbia’ya ve li-ebeveyn karındaşı Himmet nâm kimesneye münhasıra olduğu şer‘an zâhir ve müte‘ayyin oldukdan sonra mezbûr Himmet meclis-i şer‘-i hatîr-i enverde mezkûrât Rukiye ve Ümmühan ve Râbia’nın tesviye-i emirleri için savb-ı şer‘-i hatîrden mansûbe vasiyeleri olan işbu râfi‘atü’l-kitâb mezbûre Muammer tarafından husûs-ı âti’z-zikre vekîl olup zât-ı mezbûreyi ma‘rifet-i şer‘iye ile ârifân olan Hasan Çelebi b. Şa‘ban ve el-Hâc Ömer b. Abdullah şehâdetleriyle şer‘an vekâleti sâbite olan umdetü’l-emsâl ve’l-akrân Ahmed Çelebi b. Abdurrahman mahzarında bi’t-tav‘i’s-sâf ikrâr-ı sahîh-i şer‘[î] ve i‘tirâf-ı sarîh-i mer‘î kılıp mûrisim mezkûr Abdi Bey’in kalîl ve kesîr ve celîl ve hakīr ve bi’l-cümle ism-i mâl ıtlâk olunur terekesinden bi-hasebi’l-irsi’ş-şer‘î bana isâbet eden hisse-i şer‘iyemi asâleten ve vesâyeten tereke-i müteveffâ-yı mezbûra vaz‘-ı yed eden müvekkile-i mezbûre Muammer’den taleb eylediğimde beynimize muslihûn tavassut [edip] sulh sagīrât-ı mezkûrât haklarında enfa‘ ve evlâ olmağla şerâit-i sıhhat-i sulhu câmi‘ mevâni‘den ârî tehârüc-i şer‘î vechi üzre yetmiş esedî guruş üzerine beynimizde inşâ-i akd-i sulh olundukda ben-dahi sulh-i mezbûru kabûl ve bedel-i sulh olan meblağ-ı mezbûr yetmiş esedî guruşu vekîl-i mezbûr yedinden ahz ü kabz ve tesellüm edip tereke-i müteveffâ-yı mezbûra müte‘allika âmme-i de‘âvî ve muhâsamât ve eymân ve mutâlebât ve bi’l-cümle hukūk-ı ma‘lûme ve mechûle da‘vâsından mezkûrât Muammer ve Rukiye ve Ümmühan ve Râbia’yı ibrâ-i âmm-ı kātı‘u’n-nizâ‘la ibrâ ve ıskāt eyledim fîmâ-ba‘d bi-vechin mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Hüseyin Çelebi b. Dilaver, İdris Efendi b. el-Hâc Osman, Receb Efendi [b.] Hatîb-i Kethudâ Hatun, Hüseyin Bey b. Ahmed, Mehmed Bey b. İlyas, Ali Çelebi b. Üveys, Ebûbekir Efendi b. ( ), Mehmed Efendi b. Mustafa, Hasan Çelebi b. Şa‘ban, el-Hâc Ömer b. Abdullah, Mehmed Çelebi b. Abbas, Hüseyin Efendi b. Himmet, Ahmed Çelebi b. Piyale.