Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 330 Hüküm no: 300 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mehmed’in evini kendi kurduğu para vakfının mütevellisine istiğlal yoluyla sattığı Mahmiye-i İstanbul’da Hoca Kasım Gönânî Mahallesi sükkânından Ahmed Ağa b. Mehmed meclis-i şer‘-i şerîf-i enverde kendünün eczâ-i şerîfe tilâveti için vakf eylediği nukūda bi’l-fi‘il mütevellî olup Haremeyn-i Şerîfeyn Muhâsebesi halîfelerinden umdetü erbâbü’t-tahrîr ve’l-kalem Vefalı Mehmed Efendi b. Sinan tarafından husûs-ı âti’z-zikri tasdîka vekîl olup Yahya Çelebi b. Hasan ve Mehmed Bey b. Ali şehâdetleriyle şer‘an vekâleti sâbite olan diğer Mehmed Efendi b. Mustafa mahzarında ikrâr-ı tâm ve takrîr-i kelâm edip silk-i mülkümde münselik olup medîne-i Ebî Eyyûbi’l-Ensârî’de Topçular’da vâki‘ bir tarafdan benim taht-ı tasarrufumda olan çayır ve bir tarafdan müvekkil-i mûmâ-ileyhin taht-ı tasarrufunda olan tarla ve bir tarafdan tarîk-ı hâs ve bir tarafdan tarîk-ı âm ile mahdûd hâriciye ve dâhiliyesi büyût-ı adîdeyi ve eşcâr-ı müsmire ve gayr-ı müsmireli bahçeyi müştemil çiftlik ta‘bîr olunur bir bâb mülk menzilimi bi-cümleti’t-tevâbi‘ ve’l-levâhık mütevellî-i mûmâ-ileyh Mehmed Efendi’ye bin beş yüz esedî guruşa bi-tarîkı’l-istiğlâl bey‘ ve teslîm edip ol dahi ber-vech-i muharrer mal-ı vakf-ı mezbûr ile bi’t-tevliye iştirâ ve kabûl ve tesellüm eyledikden sonra semeni olan meblağ-ı mezbûr bin beş yüz esedî guruşu mütevellî-i mûmâ-ileyh yedinden tamamen alıp kabz edip yine mütevellî-i mûmâ-ileyh menzil-i mahdûd-ı mezkûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan altı ay tamamına değin bana yüz on iki buçuk esedî guruşa [îcâr] ve teslîm ben-dahi ber-vech-i meşrûh istîcâr ve kabûl ve tesellüm eyledim dedikde gıbbe’t-tasdîkı’ş-şer‘î mahmiye-i mezbûrede Kâtib Muslihiddin Mahallesi sükkânından Mehmed Bey b. Mustafa nâm kimesne menzil-i mahdûd-ı mezkûrun derkine emir ve kabûlü hâviye kefâlet-i sahîha-i şer‘iye ile kefîl olmağın mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ahmed Çelebi b. Mehmed, İbrahim Çelebi b. ( ), İbrahim Efendi el-imâm, İbrahim Halîfe b. el-müezzin, Ahmed Efendi b. Mehmed Efendi.