Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 331 Hüküm no: 301 Orijinal metin no: [91b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Trandafilo v. Todoş’un Yamandi v. Sofyanoz’daki alacağının ölünün vasîsi olan Fâtıma bt. Hızır’a teslim edilmesi Fi’l-asıl Vilâyet-i Rumeli’nde medîne-i Yenişehir muzâfâtından Agrafa nâhiyesine tâbi‘ Polaş? nâm karye sükkânından olup mahmiye-i İstanbul’da Edirnekapısı dâhilinde vâki‘ habbâz fırını ustası iken bundan akdem hâlik olan Trandafilo v. Todoş nâm zimmînin yanında mevcûd terekesini ve zimem-i nâsda olan hukūkunu taleb ve da‘vâ ve ahz ü kabza ve ba‘de’l-kabz düyûn-ı müsbetesini edâya ve fazlasını veresesine îsâle vasîyy-i muhtârı olduğunu iddi‘â eden Fâtıma bt. Hızır nâm hatun meclis-i şer‘-i şerîf-i enverde mahmiye-i mezbûrede Abdi Subaşı Mahallesi sükkânından Yamandi v. Sofyanoz nâm zimmî muvâcehesinde üzerine da‘vâ ve takrîr-i kelâm edip hâlik-i mezbûr Trandafilo bundan akdem hâl-i hayatında mâ-ba‘d-i mevtine izâfet ile yanımda mevcûd terekemi ve zimem-i nâsda olan hukūkumu taleb ve da‘vâ ve ahz ü kabz ve ba‘de’l-kabz düyûn-ı [92a] müsbetemi edâ ve fazlasını karye-i mezbûrede sâkine zevcem Pavlo bt. Yani nâm Nasrâniye ile sulbî sagīr oğullarım Yorgaki ve Kostantin’e îsâl oluna deyü vasiyet ve bu vasiyetini tenfîze beni vasîyy-i muhtâr nasb ve ta‘yîn edip ben-dahi vesâyet-i mezbûreyi kabûl ve merâsimini edâya ta‘ahhüd eylediğimden sonra musırrân mezbûr Trandafilo hâlik olmağın hâlik-i mezbûrun merkūm Yamandi zimmetinde cihet-i karz-ı şer‘îden üç bin akçe hakkı olup kable’l-ahz hâlik olmağla hâlâ taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Yamandi cevâbında hâlik-i mezbûr Trandafilo’ya cihet-i mezkûreden hâlâ zimmetinde lâzımü’l-edâ üç bin akçe deyni olduğunu ikrâr lâkin müdde‘iyye-i mezkûrenin vech-i meşrûh üzre vesâyetini inkâr edicek müdde‘iyye-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup zât-ı mezbûreyi ma‘rifet-i şer‘iye ile ârifân ve zikri mürûr eden Abdi Subaşı Mahallesi sükkânından Şa‘ban Bey b. Mehmed El-bevvâbü’s-sultânî [ve] Mustafa b. Nurullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka zikri mürûr eden Edirnekapısı dâhilinde vâki‘ habbâz fırını ustası iken hâlik olan mezbûr Trandafilo v. Todoş nâm zimmî bundan akdem hâl-i hayatında mâ-ba‘d-i mevtine izâfet ile yanımda mevcûd terekemi ve zimem-i nâsda olan hukūkumu taleb ve da‘vâ ve ahz ü kabz ve ba‘de’l-kabz düyûn-ı müsbetemi edâ ve fazlasını karye-i mezbûrede sâkine zevcem Pavlo bt. Yani nâm Nasrâniye ile sulbî sagīr oğullarım Yorgaki ve Kostantin’e îsâl oluna deyü vasiyet ve bu vasiyetini tenfîze işbu müdde‘iyye-i mezbûre Fâtıma bt. Hızır’ı bizim huzûrumuzda vasîyy-i muhtâr nasb ve ta‘yîn edip mezbûre Fâtıma dahi vesâyet-i mezbûreyi kabûl ve merâsimini edâya ta‘ahhüd eyledikden sonra mezbûr Trandafilo musırrân hâlik olmuşdur biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle mezbûre Fâtıma’nın sübût-ı vesâyetine ba‘de’l-hükm meblağ-ı mezbûr üç bin akçeyi mezbûreye edâ ve teslîme mezbûr Yamandi’ye tenbîh birle mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Mustafa Çelebi b. Dilaver, Ahmed Çelebi b. Piyale, Mehmed Bey b. Cafer, Ebûbekir Efendi b. ( ).