Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 332 Hüküm no: 302 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Beşe b. Mehmed’in evini Şaban Beşe b. Mustafa’ya vefâ yoluyla sattığı Havâss-ı Refî‘a kazâsına tâbi‘ Terkos nâhiyesinde Kağıdhâne nâm karye sükkânından Ömer Beşe b. Mehmed nâm kimesne meclis-i şer‘-i hatîrde mahmiye-i İstanbul hısnı ebvâbından Edirnekapısı dâhilinde Hadîce Sultân Mahallesi’nde sâkin işbu râfi‘u’l-kitâb Şa‘ban Beşe b. Mustafa mahzarında ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Tahta Kādı Hamamı ve bir tarafdan Musâhib Paşa bahçesi ve bir tarafdan âhar mülküm ve bir tarafdan tarîk-ı âm ile mahdûd iki bâb tahtânî oda ve bir çardak ve dört ahır ve bi’r-i mâ ve cüneyneyi müştemil mülk menzilimi mezbûr Şa‘ban Beşe’ye üç yüz seksen altı esedî guruş ve on beş akçeye târih-i kitâbdan yüz seksen bir gün tamamına dek bey‘ bi’l-vefâ tarîkı üzre bey‘ ve teslîm edip ol dahi ber-vech-i muharrer iştirâ ve kabûl ve tesellüm eylediğinden sonra semeni olan meblağ-ı mezbûr üç yüz seksen altı guruş ile on beş akçeyi mezbûr Şa‘ban Beşe yedinden tamamen ahz ü kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ali Dede b. Mustafa, el-Hâc Ramazan b. Şa‘ban, Süleyman Beşe b. Mehmed, Attar Muslı b. ( ), Berber Halil b. ( ).