Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 334 Hüküm no: 304 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kasap Ahmed Beşe b. Abdullah’ın büyük kızı Hatice’nin karısı Ayşe bt. Ahmed’e açtığı merhumdan kalan evle ilgili davanın reddedildiği Mahmiye-i İstanbul’da Mustafa Paşa-yı Atîk Mahallesi’nde sâkin iken bundan akdem vefât eden Kasab Ahmed Beşe b. Abdullah’ın verâseti zevce-i menkûhası Âişe bt. Ahmed ile kebîre kızı Hadice’ye ve sagīre kızları Hayrunnisa ve Havva’ya münhasıra olduğu şer‘an zâhir ve müte‘ayyin oldukdan sonra mezbûre Hadîce tarafından husûs-ı âti’l-beyâna vekîl-i müsecceli Mustafa Çelebi b. Mehmed meclis-i şer‘-i hatîr-i lâzımü’t-tevkīrde sagīretân-ı mezbûretânın vâlideleri ve tesviye-i emirleri için kıbel-i şer‘den mansûbe vasiyeleri olan mezbûre Âişe mahzarında bi’l-vekâle üzerine da‘vâ ve takrîr-i kelâm edip mahalle-i mezbûrede vâki‘ bir tarafı ba‘zan es-Seyyid Hasan Çelebi vakfı ve ba‘zan Zahide Hatun tasarrufunda olan vakıf menzil ve ba‘zan Fâtıma Hatun mülkü ve bir tarafı İsmail Çelebi mülkü ve bir [tara]fı Saraylı Hatun mülkü ve bir tarafı tarîk-ı âm ile mahdûd dâhiliyesi iki bâb fevkānî oda ve iki sofa ve bir kenîf ve tahtânî matbah ve bir su kuyusu ve hâriciyesi bir selâmlık ve bir tahtânî oda ve bir ahırı müştemil menzil müteveffâ-yı mezbûrun ile’l-vefât tasarrufunda mülk ve hakkı olup ba‘de-vefâtihî ırsen veresesi mezbûrâta intikāl etmiş-iken hâlâ mezbûre Âişe menzil-i mezbûrun nısf-ı şâyi‘ine bi-gayr-ı hakkın vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûre Âişe cevâbında müteveffâ-yı mezbûr vefâtından beş ay mukaddem hâl-i hayat ve kemâl-i sıhhatinde menzil-i mahdûd-ı mezbûrun nısf-ı şâyi‘ini kızları sagīretân-ı mezbûretâna iştirâk-i seviy üzre dört yüz esedî guruşa bey‘ ve temlîk ve yine velâyeten iştirâ ve tesellüm eyledikden sonra semen-i mezbûr dört yüz esedî guruşdan sagīretân-ı mezbûretânın zimmetlerini ibrâ ve ıskāt edip bu vechile menzil-i mezbûrun nısf-ı şâyi‘i mezbûretân Hayrunnisa ve Havva’nın mülk-i müşterâları olmuşdur deyü def‘le mukābele edicek gıbbe’l-istintâk ve’l-inkâr mezbûre Âişe’den ta‘ahhüd-i meşrûhuna beyyine taleb olundukda udûl-i ricâl-i Müslimînden olup mahalle-i mezbûrede sâkin Hatîb Abdurrahman Efendi b. Ali ve Müezzin Mehmed b. Mazlum nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Kasab Ahmed Beşe vefâtından beş ay mukaddem hâl-i hayat ve kemâl-i sıhhatinde hudûd-ı mezkûre ile mahdûd olan menzil-i mezbûrun nısf-ı şâyi‘ini iştirâk-i seviy üzre sagīretân-ı mezbûretân Hayrunnisa ve Havva’ya dört yüz esedî guruşa bey‘ ve temlîk ve yine mezbûretân için bi’l-velâye iştirâ ve kabûl ve tesellüm eyledikden sonra semeni olan meblağ-ı mezbûr dört yüz esedî guruşdan sagīretân-ı mezbûretânın zimmetlerini ibrâ ve ıskāt eyledi menzil-i mezkûrun nısf-ı şâyi‘i sagīretân-ı mezbûretânın mülk-i müşterâları olmuşdur biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm zikrolunan nısf-ı menzilden mu‘ârazadan vekîl-i mezbûr men‘ birle mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: es-Sâbıkūn.