Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 338 Hüküm no: 310 Orijinal metin no: [93b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah’ın sâbık Anadolu Kazaskeri Mustafa Efendi’ye emaneten verdiği parayı teslim aldığını beyan ettiği Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet sâbıkā Anadolu Kādıaskeri olan a‘lemü’l-ulemâi’l-izâm efdalü’l-fudalâi’l-fihâm yenbû‘u’l-fezâil ve’l-meâli metbû‘i’l-efâzıl ve’l-e‘âlî alemü’l-ilm ve’l-hüdâ menârü’l-fazl ve’t-tekā sa‘âdetli Mustafa Efendi hazretlerinin mahmiye-i İstanbul’da Tevkī‘î Cafer Çelebi Mahallesi’nde vâki‘ sâkin oldukları sa‘âdethâneleri karşısında olan bahçelerine varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahrûse-i Bursa mahallâtından Hacılar Mahallesi’nde sâkine olup zâtını ma‘rifet-i şer‘iye ile ârifûn Receb Efendi b. Rasûl ve İbrahim Çelebi b. Ahmed ve Mehmed Efendi b. Mustafa nâm kimesneler ta‘rîfleriyle mu‘arrefe olan Âişe Hatun bt. Abdullah meclis-i ma‘kūd-ı mezbûrda işbu kitâb-ı sıhhat-nisâb eyâdî-i şerîfeleri ile şeref-yâb olan müşârün-ileyh Mustafa Efendi hazretleri mahzarlarında bi-tav‘ihâ ikrâr ve takrîr-i kelâm edip bundan akdem müşârün-ileyh Mustafa Efendi hazretlerine bin iki yüz beş kıt‘a esedî guruşumu îdâ‘ ve teslîm onlar dahi istid‘â ve tesellüm etmişler idi hâlâ meblağ-ı mezbûr bin iki yüz beş kıt‘a esedî guruşu müşârün-ileyh hazretleri yedlerinden işbu meclis-i ma‘kūdda tamamen ahz ü kabz eyledim min-ba‘d meblağ-ı mezbûr bin iki yüz beş kıt‘a esedî guruşdan müşârün-ileyh Mustafa Efendi hazretleri kıbelinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde vukū‘u üzre tahrîr ba‘dehû ma‘an irsâl olunan Abdülfettah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Fahrü’l-müderrisîni’l-kirâm es-Seyyid Mahmud Efendi b. es-Seyyid Yakub, fahrü’l-müderrisîni’l-kirâm Uşşâkīzâde Osman Efendi, fahrü’l-müderrisîni’l-kirâm Emin Mehmed Efendi, es-Seyyid Abdülaziz Efendi el-imâm, Ömer Efendi b. İbşir Efendi, fahrü’l-müderrisîn Selim Çelebi b. Halil Efendi, Receb Ağa b. Ali, Şeyhzâde İbrahim Efendi, Çukadâr el-Hâc Mehmed.