Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 339 Hüküm no: 311 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtediye Ayşe bt. Abdullah’ın eski kocası Mosi v. Hayim’e açtığı kızının nafakasıyla ilgili davada onunla sulh olduğu Medîne-i Gelibolu’da Balıkpazarı kurbünde sâkine Âişe bt. Abdullah nâm mühtediye meclis-i şer‘-i hatîrde mahmiye-i İstanbul hısnı ebvâbından Balat kapısı dâhilinde sâkin işbu hâmilü’s-sifr Mosi v. Hayim nâm Yahûdî muvâcehesinde ikrâr ve takrîr-i kelâm edip mezbûr Mosi mukaddemâ zevcim olup ben şeref-i İslâm ile müşerrefe oldukdan sonra zevcim mezbûrdan tefrîk olunmağla mezbûrun firâşından hâsıla kızım Rahil nâm sagīrenin levâzım-ı zarûriyesi için beher yevm beşer akçe nafaka-i mefrûzasından yedi senede müctemi‘ olan yüz beş kıt‘a esedî guruşu hâlâ mezbûr Mosi’den taleb ve da‘vâ eylediğimde beynimizde nizâ‘-ı küllî vukū‘undan sonra muslihûn tavassut edip da‘vâ-yı mezbûreden merkūm Mosi ile on beş esedî guruş üzerine beynimizde inşâ-i akd-i sulh eylediklerinde ben-dahi sulh-i mezbûru kabûl ve bedel-i sulh olan meblağ-ı mezbûr on beş guruşu yedinden tamamen ahz ü kabz eyleyip sagīre-i mezbûrenin nafakasına müte‘allika cemî‘ de‘âvî ve mutâlebâtdan mezbûr Mosi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimden mâ‘adâ kızım sagīre-i mezbûreyi dokuz yaşına değin kendü mâlımdan infâk ve iksâ etmek üzre ta‘ahhüd eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Hüseyin Efendi b. Himmet, Abdülfettah Efendi b. Himmet, Mehmed Çelebi b. Haydar, Ahmed Çelebi b. Piyale, Mahmud Çelebi b. el-mukayyid.