Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 340 Hüküm no: 312 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İki aydan beri mecnûn olan Osman Bey’in işlerini görmek üzere Zeki Ali Efendi b. Mehmed’in vasî tayin edildiği Mahmiye-i İstanbul’da Davudpaşa Mahallesi ahâlîsinden olup Mukābele-i Süvâri’de başhalîfe iken bundan akdem vefât eden Mustafa Efendi’nin kebîr oğlu Osman Bey iki aydan beri cünûn-ı mutbık ile mecnûn olmağla ifâkatine değin umûrunu tesviye için bir vasî nasb ve ta‘yîn olunmak lâzım ve hakīkat-i hâli mahâllinde istikşâf için savb-ı şer‘-i kavîmden irsâl olunan İmâmzâde Mehmed Efendi b. Mustafa mezbûr Osman Bey’in mahalle-i mezbûrede vâki‘ menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mezbûrun hâline vukūf-ı tâmmı olan Mustafa Çavuş b. Veli ve diğer Mustafa Çavuş b. Ahmed ve el-Hâc Ebûbekir b. Abdullah ve İmâm Mehmed Efendi b. Mahmud ve İmâm Abdullah Efendi b. Hasan ve İbrahim Çavuş b. Şa‘ban ve Hüseyin Çavuş b. Şa‘ban ve Ahmed Ağa b. Mehmed ve Mustafa Çelebi b. Piyale ve Mehmed Bey b. Kādı ve Mustafa Bey b. Yahya ve sâirleri fi’l-hakīka mezbûr Osman Bey’in iki aydan beri cünûn-ı mutbık ile mecnûn olduğunu her biri ihbâr eyledikden sonra hakīkat-i hâli mezbûr Mehmed Efendi dahi bi’l-mu‘âyene müşâhede ve mahâllinde ketb ü terkīm edip ba‘dehû cânib-i şer‘den ma‘an ba‘s olunan Mehmed b. Ahmed ve Kenan b. Abdullah ile meclis-i şer‘a gelip alâ-vukū‘ihî inhâ ve takrîr etmeğin işbu kitâb-ı müşgîn-nikāb tevkī‘-i refî‘-i müstetâbı ile şeref-yâb olan hâkim-i ma‘delet-nisâb -tûbâ-lehû ve hüsnü-meâb- hazretleri dahi mütedeyyin ve pehrizkâr [perhizkâr] olup umûr-ı vesâyeti kemâ-yenbagī mürâ‘âta kādir olan bâ‘isü hâze’l-kitâb umdetü erbâbü’t-tahrîr ve’l-kalem Zeki Ali Efendi b. Mehmed’i mecnûn-ı mezbûrun tesviye-i umûruna vasî ve mecnûn-ı mezbûrun vâlidesi Gonca bt. Abdullah ve Bayrakdâr Mustafa Çavuş b. Veli ve İbrahim Çavuş b. Şa‘ban ve Mehmed Bey b. Musa ve Başçavuş Mustafa Ağa b. Ahmed’i nâzır nasb ve ta‘yîn buyurdukda onlar dahi kabûl ve hidemât-ı lâzımelerini kemâ-yenbagī edâya ta‘ahhüd etmeğin mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: İbrahim Bey b. ( ), Ahmed Çelebi b. (...) el-ebvâbü’s-sultânî, Hasan b. Durmuş, Haffâf Mehmed Bey el-Cündî, İmâm Mehmed Efendi b. Mehmed, Mustafa Çavuş, Ahmed Ağa b. Mehmed, Mehmed Efendi b. Mahmud el-imâm, el-Hâc Ebûbekir b. Abdullah, Abdullah Efendi b. Hasan el-imâm.