Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 342 Hüküm no: 315 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Mehmed’in Mustafa b. Mehmed’e olan borcundan kalan meblağı ödemesi Mahmiye-i İstanbul’da Kebeciler (...) (...) [Mahallesi’nde sâkin] işbu râfi‘u’l-kitâb el-Hâc Mustafa b. el-Hâc Mehmed nâm kimesne meclis-i şer‘-i hatîr-i enverde İbrahim Efendi b. Mehmed mahzarında üzerine da‘vâ ve takrîr-i kelâm edip târih-i kitâbdan dokuz ay mukaddem her destesi on sekiz esedî guruş kıymetli beş destesi benim ve beş destesi şerîkim işbu hazır bi’l-meclis el-Hâc İbrahim nâm kimesnenin mülkü olan on deste ibrişim ve on altı esedî guruş kıymetli on zirâ‘ sarı frengî atlas ve otuz guruş kıymetli bir sîm debbûs ve otuz esedî guruş kıymetli bir sîm kemer raht ve elli esedî guruş kıymetli bir sîm çapkun rahtımı bi-safkatin vâhidetin üç yüz altı esedî guruşa mezbûr İbrahim Efendi’ye nesîeten bey‘ ve teslîm ol dahi ber-vech-i muharrer iştirâ ve tesellüm etmeğin suâl olunup semenleri olan meblağ-ı mezbûr üç yüz altı esedî guruşun mezbûrdan alıverilmesi matlûbumdur dedikde gıbbe’s-suâl mezbûr İbrahim Efendi cevâbında hâl bâlâda tafsîl olunan minvâl üzre olup târih-i mezkûrda müdde‘î-i mezbûr el-Hâc Mustafa eşyâ-i mezkûrenin mecmû‘unu safka-i vâhide ile nesîeten semen-i mezkûra bana bey‘ ve teslîm ben-dahi ber-vech-i muharrer iştirâ ve tesellüm etmişidim lâkin sîmin sîme bey‘i sırf olup nesîeten adem-i cevâzına binâen bey‘-ı mezbûr fâsid ve mârrü’z-zikr debbûs ve rahtların a‘yânı mevcûde olmağın târih-i kitâbdan yirmi gün mukaddem kendüye bi-aynihî def‘ ve teslîm edip ve mârrü’z-zikr ibrişim ve atlas müstehlek olup hîn-i bey‘de kıymetleri ancak yüz yirmi beş guruş olmağın meblağ-ı mezbûr yüz yirmi beş esedî guruşun altmış guruşu mukābelesinde silk-i mülkümde münselik olan bir âhar sîm kemer rahtı kendüye def‘ ve teslîm ol dahi ahz ü kabz edip müdde‘î-i mezbûr el-Hâc Mustafa ile şerîki merkūm el-Hâc İbrahim’e zimmetimde ancak altmış beş esedî guruş deynim kalmışdır deyip ziyâde kıymetlerini inkâr ve ba‘zını ber-vech-i mezkûr def‘le mukābele edicek gıbbe’l-istintâk müdde‘î-i mezbûr el-Hâc Mustafa cevâbında mârrü’z-zikr debbûs ve kemer raht ve çapkun rahtının aynlarını ve mârrü’z-zikr ibrişim ve atlas kıymetlerini dahi altmış guruşu mukābelesinde mezbûr İbrahim Efendi’den bir sîm kemer rahtını ahz ü kabzını bi-tav‘ihiikrâr etmeğin müdde‘î-i mezbûrdan mârrü’z-zikr ibrişim ve atlasın hîn-i bey‘de kıymetleri meblağ-ı mezbûr yüz doksan altı esedî guruş olduğuna beyyine taleb olundukda ityân-ı beyyine için istimhâl etmeğin mehl-i şer‘î birle imhâl olundukdan sonra ikrârı mertebesi olan meblağ-ı bâkī-i mezbûr altmış beş esedî guruşu edâ ve teslîme mezbûr İbrahim Efendi’ye tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ahmed Çelebi b. Abdurrahman, Mehmed Çelebi b. Haydar, Mehmed Bey b. Cafer, Mahmud Çelebi b. el-mukayyid, Ahmed Çelebi b. Piyale.