Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 343 Hüküm no: 316 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emrullah Çavuş’un karısı olduğunu ispat eden Ceyhun bt. Abdullah’a merhumun terekesinden mehrinin ve isabet eden hissesinin teslim edilmesi Mahmiye-i İstanbul’da Fenâyî Dede Mahallesi’nde sâkin iken bundan akdem vefât eden Emrullah Çavuş’un zevce-i menkûhası olduğunu iddi‘â eden Ceyhun bt. Abdullah nâm hatun Dîvân-ı Hümâyûn-ı devlet-makrûnda ma‘kūd meclis-i şer‘-i şerîfde müteveffâ-yı mezbûrun kebîre kızı ve terekesine vâzı‘atü’l-yed olan Âişe nâm hatun tarafından husûs-ı âti’z-zikre vekîl olup zât-ı mezbûreyi ma‘rifet-i şer‘iye ile ârifân olan Ahmed b. Kemâl ve Ali b. (...) şehâdetleriyle şer‘an vekâleti sâbite olan Mustafa b. Bayram mahzarında üzerine da‘vâ ve takrîr-i kelâm edip ben müteveffâ-yı mezbûrun câriye-i memlûkesi olup hâl-i sıhhatinde târih-i kitâbdan otuz sene mukaddem beni mâlından tahrîr ve i‘tâk edip ben sâir harâir-i asliyât gibi hürre olduğumdan sonra bir sene mürûr etdikde on bin akçe mehr-i müeccel ile nefsimi mezbûr Emrullah Çavuş’a inkâh ve tezvîc ol dahi tezevvüc ve kabûl edip hâlâ vefât etdikde tereke-i vâfiyesinden mehr-i mezbûr ile semeni hissemi vaz‘-ı yed eden mezbûre Âişe’den taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl vekîl-i mezbûr cevâbında müdde‘iyye-i mezkûre müteveffâ-yı mezbûrun câriye-i memlûkesi olduğunu bi’l-vekâle ikrâr lâkin mezbûrenin ber-vech-i mübeyyen mu‘teka ve menkûha idüğünü inkâr edicek müdde‘iyye-i mezbûreden müdde‘âsına beyyine taleb olundukda mezbûrenin zâtını ma‘rifet-i şer‘iye ile ârifân olup yine mahmiye-i mezbûrede Koruk Mahmud Mahallesi’nde sâkin udûl-i Müslimînden Mehmed b. Ahmed ve Odabaşı Mahallesi’nde sâkin Hüseyin b. Musa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu müdde‘iyye-i mezbûreyi mevlâsı müteveffâ-yı mezbûr Emrullah Çavuş hâl-i sıhhatinde târih-i kitâbdan otuz sene mukaddem câriye-i memlûkesi olduğu hâlde bizim huzûrumuzda mâlından tahrîr ve i‘tâk edip mezbûre Ceyhun sâir harâir-i asliyât gibi hürre oldukdan sonra yine mezbûre Ceyhun bir sene mürûrunda on bin akçe mehr-i müeccel ile nefsini kezâlik huzûrumuzda mezbûr Emrullah Çavuş’a inkâh ve tezvîc ol dahi tezevvüc ve kabûl etmişidi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı mezbûrânı ta‘dîl ve tezkiye için savb-ı şer‘den irsâl olunan Mustafa Efendi b. Abdülaziz zikrolunan Koruk Mahmud Mahallesi’ne varıp ahâlîsinden İmâm Yakub Efendi b. Şa‘ban ve Müezzin Mehmed b. Süleyman ve Attar Hüseyin b. Abdullah ve Berber İbrahim b. Mehmed ve Mehmed b. Ebîbekir ve Mehmed Çelebi b. Mustafa ve Sarrâc Mehmed Çelebi b. Mustafa ve Sarrâc Mehmed b. Ömer ve Hüseyin Beşe b. Ahmed ve Mehmed Efendi b. Mustafa ve Mustafa Beşe b. Abdullah ve Mehmed Beşe b. Ramazan ve sâirlerinden mezbûr Hüseyin’in keyfiyet-i hâlini istihbâr etdikde her biri adl ve makbûlü’ş-şehâde olduğunu haber vermeğin zikrolunan Odabaşı Mahallesi’ne varıp ahâlîsinden Müezzin Mehmed Efendi b. Mustafa ve Müezzin Mehmed Efendi b. Yahya ve Attar Halil Çelebi b. İbrahim ve Seyyid Mehmed b. Hüseyin ve İslam Beşe [b.] Zülfikar ve Mehmed Beşe b. Abdullah ve Hüseyin Çelebi b. Hasan ve Mehmed b. Receb ve sâirlerinden mezbûr Mehmed’in keyfiyet-i hâlini istihbâr etdikde merkūm Mehmed’in adl ve makbûlü’ş-şehâde olduğunu her biri haber vermeğin vâki‘ hâli mezbûr Mustafa Efendi mahâllinde ketb ve terkīm edip ba‘dehû cânib-i şer‘den ma‘an irsâl olunan Mehmed b. Ahmed ile meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ali b. Mehmed, Hüseyin Çelebi b. Musa, Muhzırbaşı Osman Ağa, Mehmed Çelebi b. (...).