Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 346 Hüküm no: 318 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ahmed’in Diyarbakır’da mübaşir iken isimleri yazılı altı kişiden haksız yere aldığı 650 kuruşu geri ödemesi (...) [Vilâyet-i] Anadolu’da medîne-i Diyarbekir’e tâbi‘ Ardıç-ı Süflâ nâm karye sükkânından Mardiros v. Nikogos ve Haçok v. Mardiros ve diğer Haçok v. Nikogos ile Ardıç-ı Ulvî nâm karye sükkânından Vartan v. Haçok ve Ağya v. Nikogos ve Hazerşe v. Soga nâm Ermeniler meclis-i şer‘de Mustafa b. Ahmed mahzarında üzerine da‘vâ ve takrîr-i kelâm edip târih-i kitâbdan üç buçuk sene mukaddem vezîr-i rûşen-zamîr rif‘atlü Kaplan Mustafa Paşa hazretleri Diyarbekir vâlîsi iken mezbûr Mustafa mûmâ-ileyhin mütesellimi Şeyhzâde Zeynelabidin Ağa tarafından subaşı İbrahim Ağa’nın makbûzâtını teftîş için karyelerimize mübâşir gelip ahâlîleri firâr etmekle altı neferden bi-gayr-ı hakkın zulmen altı yüz elli esedî guruşumuzu ahz ü kabz etmişdir suâl olunup ber-vech-i meşrûh <<üzre>> makbûzunu bize red ve teslîme mezbûr Mustafa’ya tenbîh olunmak matlûbumuzdur dediklerinde gıbbe’s-suâl ve akībe’l-inkâr müdde‘iyyûn-ı mezbûrûndan müdde‘âlarına beyyine taleb olundukda yine medîne-i mezkûreye tâbi‘ Hindibaba nâm karye ahâlîsinden olup mahmiye-i İstanbul’da Sultân Mehmed Han Câmi‘-i Şerîfi kurbünde Ali Paşa odalarında sâkin Mehmed b. Yusuf ve Saraçhâne kurbünde kârhânede müsâferet üzre sâkin yine medîne-i mezbûreye tâbi‘ Elyos nâm karyeden İbrahim b. Veli nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mûmâ-ileyh hazretleri târih-i kitâbdan üç buçuk sene mukaddem Diyarbekir vâlîsi iken işbu mezbûr Mustafa mütesellimi Şeyhzâde Zeynelabidin Ağa tarafından subaşı İbrahim Ağa makbûzunu teftîş için zikrolunan karyelere mübâşir gelip ahâlîleri firâr etmekle işbu müdde‘iyyûn-ı mezbûrûn Mardiros ve Haçok ve diğer Haçok ve Vartan ve Ağya ve Hazerşe’yi ahz ve bi-gayr-ı hakkın zulmen zikrolunan altı neferden altı yüz elli esedî guruşların bizim huzûrumuzda ahz ü kabz eyledi biz bu husûsa bu vech üzre şâhidleriz şehâdet dahi ederiz deyü her birleri edâ-i şehâdet-i şer‘iye eylediklerinde şâhidân-ı mezbûrânı ta‘dîl ve tezkiye için savb-ı şer‘-i kavîmden irsâl olunan Mustafa Efendi b. Derviş Efendi mârrü’z-zikr odalara varıp fi’l-asl medîne-i mezbûre ahâlîsinden olup bi-tarîkı’l-müsâfere mezkûr odalarda sâkin Mahmud Beşe b. Osman ve Ahmed b. Mehmed ve Hasan b. Hüseyin ve Ali b. Abdullah ve Karagümrük’de Menzil? hânında sâkin Ali Beşe b. Üveys ve Veli b. Şükrullah ve Mehmed Beşe b. Abdullah nâm kimesnelerden mezbûr Mehmed’in keyfiyet-i hâlini istihbâr etdikde mezbûrûnun her biri şâhid-i mezbûr için adl ve makbûlü’ş-şehâde olduğunu haber verdikden sonra zikrolunan kârhâneye varıp Âmidî es-Seyyid Ali b. [96a] Salih ve İbrahim b. Murad ve Mehmed b. Veli ve Hamza b. Ali ve Mehmed b. Ali ve Mehmed b. Abdullah ve sâirlerinden şâhid-i mezbûr İbrahim’in keyfiyet-i hâlini istifsâr etdikde her biri kezâlik şâhid-i mezbûrun adl ve makbûlü’ş-şehâde olduğunu haber vermeğin vâki‘ hâli mezbûr Mustafa Efendi ketb ve terkīm edip ba‘dehû cânib-i şer‘den ma‘an irsâl olunan Mehmed b. Ahmed ile meclis-i şer‘a gelip alâ-vukū‘ihî inhâ ve takrîr etmeğin şâhidân-ı mezbûrân sırren ve alenen ta‘dîl ve tezkiye olunup şehâdetleri makbûle olmağın mûcebiyle ba‘de’l-hükm mâ-hüve’l-vâki‘ [bi’t-taleb ketb olundu]. Fî 26 min-şehri Rebî‘ülevvel sene [10]91. Şuhûdü’l-hâl: el-Hâc Kemâleddin Ağa b. Müyesser, el-Hâc Hüseyin b. Hasan, Osman Ağa b. Muhzırbaşı, Mehmed Çelebi b. Piyale, Ramazan Beşe b. ( ).