Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 347 Hüküm no: 319 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Receb’in iki vakfa olan borcunu ikrar ettiği Dârü’l-hilâfeti’l-aliyye Kostantıniyye el-mahmiye’de Dizdâriye Mahallesi sükkânından Mustafa Ağa b. Receb nâm kimesne meclis-i şer‘-i şerîf-i enverde mahmiye-i mezbûrede Muazzez Sultân vakfına ve Saray-ı Atîk-i Sultânî teberdârlarının mihmânlarına mevkūfe nukūda bi’l-fi‘il mütevellî olan işbu râfi‘u’l-kitâb Süleyman Bey b. Ahmed nâm kimesne mahzarında bi’t-tav‘i’s-sâf ikrâr ve i‘tirâf edip zikrolunan Saray-ı Atîk teberdârları vakfının asl-ı mâlından iki yüz yetmiş esedî guruş ve devr-i şer‘î ile üzerime ilzâm olunmuş murâbaha-i şer‘iyesinden dahi kırk esedî guruş ve zikri mürûr eden Muazzez Sultân vakfının asl-ı mâlından yüz esedî guruş ki cem‘an vakfeyn-i mezkûreyne zimmetimde dört yüz on esedî guruş lâzımü’l-edâ ve vâcibü’l-kazâ deynim vardır dedikde mukırr-ı mezbûr Mustafa Ağa’nın vech-i muharrer üzre cârî ve sâdır olan ikrârıyla el-mukarru lehu’l-mezbûr vicâhen tasdîk ve şifâhen tahkīk edicek mâ-hüve’l-vâki‘ [bi’t-taleb ketb olundu]. Fî 29 min-Rebî‘i’l-evvel sene [10]91. Şuhûdü’l-hâl: Mehmed Çavuş b. Musa el-Mübâşir, Mehmed Çelebi b. Ali, el-Hâc Osman b. el-Hâc Osman, Mehmed Çelebi b. Haydar.