Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 348 Hüküm no: 320 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeğen Ahmed Ağa’nın vefat eden Ali Ağa b. Abdullah’tan haksız yere aldığı bir adet Şam dikdiğinin aynını veya kıymetini varislerine teslim etmesi Mahmiye-i İstanbul’da Bostancıbaşı Mahallesi’nde sâkin iken bundan akdem vefât eden Ali Ağa b. Abdullah’ın verâseti zevce-i menkûhası Ümmühani bt. Ali ile li-ebeveyn kız karındaşı oğlu Süleyman b. Abdullah’a münhasıra olduğu şer‘an zâhir ve müte‘ayyin oldukdan sonra mezbûr Süleyman asâleten ve merkūme Ümmühani tarafından husûs-ı âti’l-beyâna vekîl olup zât-ı mezbûreyi ma‘rifet-i şer‘iye ile ârifân Süleyman b. Abdurrahman ve İlyas b. Veli şehâdetleri ile şer‘an vekâleti sâbite olan Ahmed b. Mustafa vekâleten meclis-i şer‘-i hatîr-i lâzımü’t-tevkīrde işbu bâ‘isü’l-kitâb umdetü’l-eşbâh ve’l-emsâl Yeğen Ahmed Ağa b. es-Seyyid Salih mahzarında her biri üzerine da‘vâ ve takrîr-i kelâm edip müteveffâ-yı mezbûrun hayatında merkūm Ahmed Ağa’nın kendi ile beynlerinde cereyân eden ahz ü i‘tâ ve mu‘âmelât-ı şettâyı beynimizde hesâb edip merkūm Ahmed Ağa’nın müteveffâ-yı mezbûrdan hayatında bi-gayr-ı hakkın ahz ü kabz eylediği yedi aded yaldızlı sîm yağmurluk düğmesi ve bir sîm kılıç ve bir Şam dikdiğinden mâ‘adâ merkūm Ahmed Ağa’da zuhûr eden hakkımızı ahz ü kabz ve müteveffâ-yı mezbûrun terekesine müte‘allika mezbûr Ahmed Ağa ile kat‘a da‘vâ ve nizâ‘ımız kalmamağla hâlâ suâl olunup mârrü’z-zikr düğme ve kılıç ve dikdik mevcûd ise aynlarını müstehlek ise ba‘de’s-sübût kıymet-i şer‘iyelerini bize teslîme merkūm Ahmed Ağa’ya tenbîh olunmak matlûbumuzdur dediklerinde gıbbe’s-suâl merkūm Ahmed Ağa cevâbında müteveffâ-yı mezbûr Ali Ağa bundan akdem hâl-i hayat ve kemâl-i sıhhatinde zikrolunan yaldızlı yedi aded sîm yağmurluk düğmesi ile bir sîm kılıcını bana hîbe-i sahîha-i şer‘iye ile hîbe ve temlîk ve teslîm ben-dahi meclis-i hîbede ittihâb ve kabûl ve kabz [ve] istihlâk etmişidim deyü def‘le mukābele ve mârrü’z-zikr dikdiği kabzını inkâr edicek evvelâ mezbûr Ahmed Ağa’dan def‘-i meşrûhuna beyyine taleb olundukda udûl-i Müslimînden olup mahmiye-i mezbûrede Kabasakal Mahallesi’nde sâkin Şa‘ban Bey b. Nuh ve Âmidî (...) Ağa b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Ali Ağa bundan akdem hâl-i hayat ve kemâl-i sıhhatinde zikri mürûr eden yedi aded yaldızlı sîm yağmurluk düğmesi ile bir sîm kılıcını bizim huzûrumuzda merkūm Ahmed Ağa’ya hîbe-i sahîha-i şer‘iye ile hîbe ve temlîk ve teslîm ol dahi meclis-i hîbede ittihâb ve kabûl ve kabz eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra müdde‘iyyân-ı mezbûrândan zikrolunan dikdiğe beyyine taleb olundukda ityân-ı beyyineden izhâr-ı acz ve istihlâf edicek merkūm Ahmed Ağa’ya zikrolunan [dik]diği ber-vech-i mübeyyen ahz etmeyip ol vechile mevcûde ise aynını müstehlek ise ba‘de’s-sübût kıymet-i şer‘iyesini red ve teslîm lâzım gelmediğine yemîn teklîf olundukda nükûl etmeğin mûcebiyle mârrü’z-zikr dikdiğin aynını yâhûd ba‘de’s-sübût kıymet-i şer‘iyesini müdde‘iyyân-ı mezbûrâna red ve teslîme merkūm Ahmed Ağa’ya ba‘de’t-tenbîh ziyâde mutâlebeden mezbûrân men‘ olunup mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Hasan Çelebi b. (...) [Mustafa], el-Hâc (...) Ağa b. ( ), Ahmed Çelebi b. Abdurrahman, Mehmed Çelebi b. Haydar, Ahmed Çelebi b. Piyale, İbrahim Çelebi b. Mustafa.