Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 350 Hüküm no: 322 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ümmühani adlı hatunun varislerinin Kâtib Muslı Halil vakfının mütevellisine açtıkları alacak davasının reddedildiği Mahmiye-i İstanbul’da Sofular Mahallesi’nde sâkin iken bundan akdem fevt olan Ümmühani nâm hatunun verâseti babası Mustafa b. Timur ile vâlidesi Safiye bt. Sunullah ve zevc-i metrûkü Receb b. Habib’e münhasıra olduğu şer‘an zâhir ve müte‘ayyin oldukdan sonra mezbûrân Safiye ve Receb meclis-i şer‘de merhûm Kâtib Muslı Halil vakfına bi’l-fi‘il mütevellî olan bâ‘isü hâze’l-kitâb el-Hâc Mehmed Efendi b. Nurullah mahzarında her biri üzerine da‘vâ ve takrîr-i kelâm edip müteveffât-ı mezbûrenin ile’l-vefât silk-i mülkünde münselik olup ba‘de-vefâtihâ ırsen bize isâbet eden mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzili âhara bey‘ olundukda mezbûr Mehmed Efendi semeninden bi-gayr-ı hakkın yüz altmış esedî guruş <> ahz ü kabz etmişdir suâl olunup meblağ-ı mezbûrdan hisse-i irsiyemizin alıverilmesi matlûbumuzdur dediklerinde gıbbe’s-suâl mezbûr el-Hâc Mehmed Efendi cevâbında müteveffât-ı mezbûre Ümmühani Hatun’a hayatında yedimde olan mal-ı vakf-ı mezbûrdan yüz altmış esedî guruşunu idâne ve teslîm ol dahi istidâne ve kabz eyledikden sonra fevt olup meblağ-ı mezbûr zimmetinde kalmağın [97a] sene semân ve semânîn ve elf Cumâdelâhiresinin onuncu günü İstanbul kādısı olan Kebîrîzâde Mustafa Efendi huzûrunda merkūm Mustafa’nın vekîl-i müsecceli Mehmed Çelebi b. Ali ile mezbûre Safiye muvâcehelerinde meblağ-ı mezbûru ve müdde‘âmı mahalle-i mezbûre ahâlîsinden İmâm Abdüllatif Efendi b. el-Hâc Halil ve es-Seyyid Mehmed Çelebi b. es-Seyyid Abdülkerim ve es-Seyyid Abdülkerim b. es-Seyyid Süleyman ve el-Hâc Hasan b. İlyas şehâdetleri ile şer‘an isbât edip ba‘de’t-tahlîfi’ş-şer‘î mûcebiyle hâkim-i müşârün-ileyh tereke-i vâfiye-i müteveffât-ı mezbûreden bana vakıf için edâya hükm ve yedime hüccet-i şer‘iye vermeğin semen-i mezkûrdan meblağ-ı mezbûru kabz ve istifâ eyledim deyü def‘ ile mukābele ve müşârün-ileyh Mustafa Efendi’nin imzâsıyla mümzât ve hatmi ile mahtûme ve târih-i mezbûr ile müverraha hüccet-i şer‘iye ibrâz edip mezbûrân muvâcehelerinde feth ve kırâet olundukda mazmûnu min-külli’l-vücûh takrîr-i meşrûhunu nâtık bulunmağın gıbbe’l-istintâk mezbûrân mazmûn-ı hüccet-i mezkûreyi bi’l-külliye inkâr edicek mezkûr el-Hâc Mehmed Efendi’den mazmûn-ı hüccet-i mezkûreye beyyine taleb olundukda zeyl-i hüccet-i mezbûrede mektûbü’l-esâmî Müslimînden olup Alâaddin Mescid-i Şerîfi imâm[ı] Muharrem Efendi b. Himmet ve Sofular Mahallesi’nde sâkin İmâm Cafer Efendi b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mütevellî-i mezbûr el-Hâc Mehmed Efendi sene semân ve semânîn ve elf senesi Cumâdelâhiresinin onuncu günü İstanbul kādısı olan müşârün-ileyh Kebîrîzâde Mustafa Efendi huzûrunda merkūm Mustafa’nın vekîl-i müsecceli mezbûr Mehmed Çelebi b. Ali ve merkūme Safiye muvâcehelerinde müteveffât-ı mezbûre Ümmühani’ye hâl-i hayatında yedinde olan mal-ı vakf-ı mezbûrdan yüz altmış esedî guruş idâne ve teslîm ol dahi istidâne ve kabz ve istihlâk edip ber-vech-i mübeyyen zimmetinde deyni olduğunu da‘vâ ve müdde‘âsını merkūmân İmâm Abdüllatif b. el-Hâc Halil ve es-Seyyid Mehmed Çelebi b. es-Seyyid Abdülkerim ve es-Seyyid Abdülkerim b. es-Seyyid Süleyman ve el-Hâc Hasan b. İlyas şehâdetleri ile huzûrumuzda şer‘an isbât edip ba‘de’t-tahlîf müşârün-ileyh tereke-i vâfiye-i mezbûreden vakıf için edâya hükm ve işbu hüccet-i şer‘iye tahrîr olundukda imzâ edip ve mühürleyip mezbûra teslîm eyledi biz mazmûn-ı hüccet-i mezkûreye şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle mezbûrân bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-işrîn min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Hüseyin Efendi b. Himmet, Ebûbekir Efendi b. ( ), Mehmed Çelebi b. Haydar, Ahmed Çelebi b. Abdurrahman. [Beyaz]