Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 352 Hüküm no: 323 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ümmühani adlı hatunun varislerinin merhumeden kalan evi satın alıp parasını ödemediği iddiasıyla Ömer Beşe b. Murtaza’ya açtıkları davanın reddedildiği Medîne-i İstanbul’da Sofular Mahallesi’nde sâkin iken bundan akdem fevt olan Ümmühani nâm hatunun verâseti babası Mustafa b. Timur ile vâlidesi Safiye bt. Sunullah ve zevc-i metrûkü Receb b. Habib’e münhasıra olduğu şer‘an zâhir ve müte‘ayyin oldukdan sonra mezbûrân Safiye ve Receb meclis-i şer‘-i hatîr-i lâzımü’t-tevkīrde işbu râfi‘u’l-kitâb Ömer Beşe b. Murtaza mahzarında her biri üzerine da‘vâ ve takrîr-i kelâm edip tereke-i müteveffât-ı mezbûreden olup ba‘de-vefâtihâ ırsen bize isâbet eden mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd hâlâ savb-ı şer‘den keşf ve mesâha olunup kıymeti ol mikdâra bâliğ olan menzili mezbûre Ümmühani’nin vefâtından sonra mezbûr Ömer Beşe’ye otuz bin akçeye bey‘ ve teslîm ol dahi iştirâ ve kabûl ve tesellüm ve hâlâ mâlikâne mutasarrıf iken semen-i mezbûrdan ırsen ikimize isâbet eden yirmi bin akçeyi bize teslîmden imtinâ‘ eder suâl olunup alıverilmesi matlûbumuzdur dediklerinde gıbbe’s-suâl mezbûr Ömer Beşe cevâbında fi’l-hakīka menzil-i mezbûr müteveffât-ı mezbûrenin ile’l-vefât mülkü olup ba‘de-vefâtihâ ırsen mezbûrûn Mustafa ve Safiye ve Receb’e intikāl etmişidi lâkin mezbûrenin düyûnunu edâ için mezbûrûn otuz bin akçeye bey‘ ve teslîm ben-dahi iştirâ ve kabûl eylediğimden sonra semen-i mezbûr otuz bin akçeyi kendülere bi’t-tamam edâ ve teslîm onlar dahi ahz ü kabz ve tesellüm eylediler deyü def‘le mukābele edicek gıbbe’l-istintâk ve’l-inkâr mezbûr Ömer Beşe’den def‘-i meşrûhuna beyyine taleb olundukda yine mahalle-i mezbûrede sâkin udûl-i Müslimînden el-Hâc Mehmed Efendi b. Nurullah ve İmâm Muharrem Efendi b. Himmet ve İmâm Cafer Efendi b. Abdullah nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müteveffât-ı mezbûrenin veresesi mezbûrûn Mustafa ve Safiye ve Receb menzil-i mezbûru merkūm Ömer Beşe’ye ber-vech-i meşrûh otuz bin akçeye bey‘ ve teslîm ol dahi iştirâ ve kabz etdikde semeni olan meblağ-ı mezbûr otuz bin akçeyi bizim huzûrumuzda mezbûrûna bi’t-tamam edâ ve teslîm onlar dahi ahz ü kabz ve tesellüm eylediler biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle mezbûr Safiye ve Receb bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-işrîn min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: es-Sâbıkūn.