Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 353 Hüküm no: 324 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Ahmed ile karısının ev ve bahçelerini Tabib Ali vakfının mütevellisine istiğlal yoluyla sattıkları Mahmiye-i İstanbul’da Avcı Bey Mahallesi ahâlîsinden olup kendü tarafından asîl ve zevcesi (...) bt. Muharrem tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iye ile ârifân Ahmed Bey b. Mehmed ve Halil Beşe b. Muslı şehâdetleriyle şer‘an sâbit olan Mehmed Çelebi b. Ahmed nâm kimesne meclis-i şer‘-i şerîfde mahmiye-i mezbûrede Tabib el-Hâc Ali vakfına bi’l-fi‘il müteve[llî] olan işbu bâ‘isü’l-kitâb Kenan Efendi b. Abdullah mahzarında asâleten ve vekâleten ikrâr ve takrîr-i kelâm edip zevcem müvekkile-i mezbûre ile ale’l-iştirâki’s-seviy mülk ve hakkımız olup mahalle-i mezbûrede vâki‘ bir tarafdan ba‘zan Cafer Bey mülkü ve ba‘zan Lakrina Nasrâniye mülkü ve bir tarafdan ba‘zan Hüseyin Bey vakfı olan odalar ve ba‘zan Sarrâc Zimmî mülkü ve ba‘zan müezzine meşrût menzil ve iki tarafından tarîk-ı âm ile mahdûd beş bâb fevkānî odaları ve iki sofayı ve bir bâb tahtânî oda ve bir mahzen ve kenîfi muhtevî mülk menzil ile ona muttasıl bir su kuyusunu ve eşcâr-ı müsmireyi müştemil bir kıt‘a bahçeyi mütevellî-i mezbûra yüz kıt‘a esedî guruşa safka-i vâhide ile bi-tarîkı’l-istiğlâl bey‘ ve teslîm ol dahi iştirâ ve tesellüm ve kabûl eyleyip semeni olan meblağ-ı mezbûr yüz guruşu mütevellî-i mezbûr yedinden asâlet ve vekâletim hasebiyle bi’t-tamam ahz ü kabz eylediğimden sonra mütevellî-i merkūm Kenan Efendi yine sâlifü’z-zikr menzil ve bahçeyi gıbbe’t-tahliyeti’ş-şer‘iye ve’t-takābuzı’l-mer‘î târih-i kitâbdan üç sene tamamına dek beher sene on beşer guruşa bana îcâr edip ben-dahi ber-vech-i muharrer istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: Hüseyin Efendi b. Hasan İmâm, Mehmed Bey b. Ali, Mustafa b. İbrahim, Mustafa b. Mehmed, Abdurrahman b. ( ).