Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 357 Hüküm no: 330 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zümrüd bt. Kostantin’in kendisini boşayan kocası Kurd v. Egenebalı’yı yaralama davasından ibra ettiği Mahmiye-i İstanbul’da Mirâhur Mahallesi’nde sâkin Zümrüd bt. Kostantin nâm Nasrâniyenin karındaşı ve husûs-ı âti’l-beyâna vekîl olup mezbûrenin zâtını ma‘rifet-i şer‘iye ile ârifân Mehmed b. Abdullah ve diğer Mehmed Çelebi b. Hasan şehâdetleriyle şer‘an [vekâleti] sâbit olan Nüket v. Kostantin nâm zimmî meclis-i şer‘-i hatîrde müvekkile-i mezbûrenin zevc-i mutallıkı işbu hâmilü’s-sifr Kurd v. Egenebalı nâm zimmî muvâcehesinde bi’l-vekâle ikrâr ve takrîr-i kelâm edip merkūm Kurd mukaddemâ zevcesi müvekkile-i mezbûreyi tatlîk etmeğin mezbûrun firâşından hâsıl sadriye kızı La‘lî nâm sagīreyi müvekkilem mezbûre dokuz yaşına dek kendi mâlından infâk ve iksâ etmek üzre ta‘ahhüd eyledikden mâ‘adâ zevciyet beynlerinde kāime iken merkūm Kurd’un darbından nâşî müvekkilem mezbûre Zümrüd mecrûha olmağın cerh-i mezbûr ve andan hâdis olan cemî‘ de‘âvî ve mutâlebât ve eymân ve muhâsamâtdan müvekkilem mezbûre merkūm Kurd’un zimmetini ibrâ-i âmm-ı kātı‘u’[n-nizâ‘la] ibrâ ve ıskāt eyledi dedikde mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: İsmail Çavuş b. (...), Receb Çelebi b. Mehmed, Mehmed Çelebi b. Hasan, Mehmed b. Abdullah ve gayruhum mine’l-hâzırîn.