Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 357 Hüküm no: 331 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitraki v. Yanaki’nin kendisine sattığını iddia ettiği koyunlarla ilgili Manol v. Petre’ye açtığı alacak davasının reddedildiği Havâss-ı Refî‘a muzâfâtından Çatalca’da İskarlet Mahallesi’nde sâkin celeb tâifesinden Dimitraki v. Yanaki nâm zimmî meclis-i şer‘-i şerîfde mahmiye-i İstanbul’da Karabaş Mahallesi’nde sâkin işbu râfi‘u’l-vesîka Manol v. Petre nâm zimmî muvâcehesinde üzerine da‘vâ ve takrîr-i kelâm edip mezbûr Manol zimmetinde târih-i kitâbdan on sekiz ay mukaddem kendüye bey‘ ve teslîm eylediğim her re’si ikişer yüz dörder akçeye olmak üzre bin iki yüz re’s kıvırcık koyun semeninden iki yük kırk dört bin sekiz yüz akçe hakkım olup meblağ-ı mezbûrdan yüz yedi bin akçesini Sofya Keşişi Aleksandıra nâm ruhbândan ve yüz otuz yedi bin sekiz yüz akçesini Todori v. Dimitri’den ahz ü kabz etmek üzre beni tevkîl dahi etmişidi mezbûrândan meblağ-ı mesfûru (...) [bi-gayr-ı] hakkın ahz ü kabz etmeğin suâl olunup meblağ-ı mezbûrun alıverilmesi matlûbumdur dedikde gıbbe’s-suâl merkūm Manol cevâbında müdde‘î-i mezbûrdan zikrolunan bin iki yüz re’s koyunları ber-vech-i muharrer iştirâsını bi’l-külliye inkâr etdiğinden mâ‘adâ merkūm Dimitraki bin seksen dokuz senesi Zilka‘desi’nin yirmi beşinci günü zimmetimde cihet-i deyn-i şer‘îden ancak sekiz yüz esedî guruşu olup meblağ-ı mezbûru bi’t-tamam ahz ü kabz ve tesellüm edip meblağ-ı mezbûra ve ol târihe gelince sâir beynimizde vâki‘ olan ahz ü i‘tâ ve mu‘âmelât-ı şettâya müte‘allika âmme-i de‘âvî ve mutâlebât ve eymân ve muhâsamâtdan her birimiz âharın zimmetini ibrâ-yı âmm-ı kātı‘u’n-nizâ‘la ibrâ ve ıskāt edip hatta ol târihden [târihde] mahrûse-i Edirne’de Bâb nâib[i] olan Abdülkerim Efendi huzûrunda zikrolunan kabz ve ibrâsını ikrâr edip ber-vech-i meşrûh ikrârı hüccet olundukdan sonra mezbûr Abdülkerim Efendi imzâ dahi edip yedime teslîm etmişidi zikri mürûr eden ibrâ muahhar olmağla da‘vâ-yı mezkûreden berî olmuşdur deyü def‘[l]e mukābele ve merkūm Abdülkerim Efendi’nin imzâsıyla mümzât ve hatmiyle mahtûme ve târih ile müverraha bir kıt‘a hüccet-i şer‘iye ibrâz edip nazar olundukda fi’l-hakīka mazmûnu min-külli’l-vücûh takrîr-i meşrûhuna muvâfık olmağın gıbbe’l-istintâk mezbûr Dimitraki mazmûn-ı hüccet-i mersûmeyi bi’t-tav‘i’s-sâf ikrâr ve i‘tirâf etmeğin mezbûr Dimitraki’nin i‘tirâfı üzre târih-i ibrâ muahhar olmağla bî-vech mu‘ârazadan mezbûr Dimitraki men‘ olunup mâ-hüve’l-vâki‘ bi’t-taleb ketb olundu. Fî-gurreti Rebî‘i’l-âhir li-sene ihdâ ve tis‘în ve elf. Şuhûdü’l-hâl: Karakaş Mehmed Çavuş b. Pîrî, Mehmed Çavuş b. Abdullah, Mehmed Ağa b. Ali, Ahmed Çavuş b. Abdullah, Hasan Beşe b. Mustafa, İmâm Abdurrahman b. Mehmed ve gayruhum.