Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 361 Hüküm no: 335 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Abdülaziz Efendi’nin Ümmühani Hatun’dan satın aldığı evin bedelini ödemesi Husûs-ı âti’l-beyânın mahâllinde istimâ‘ [ve] tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet mahmiye-i İstanbul’da Tercüman Yunus Mahallesi’nde sâkin Halil Beşe b. Hızır’ın menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahmiye-i mezbûrede Kâtib Muslihiddin Mahallesi’nde sâkin iken bundan akdem vefât eden Veli Bey b. Mustafa’nın verâseti zevce-i metrûkesi Şah Huban bt. Ali Efendi’ye ve sulbiye kızı Ümmühani’ye ve hîn-i vefâtında sagīr ve hâlâ kebîr olan oğlu Murtaza’ya münhasıra ve mezbûre Şah Huban tereke-i müteveffâ-yı mezbûrdan yirmi dört sehimden kendüye isâbet eden üç sehim hisse-i şer‘iye-i irsiyesi mukābelesinde ma‘lûmü’l-mikdâr meblağ tehârüc tarîkı üzre ıslâh [ve] ihrâc olunup tereke eslâsen mezbûrân Murtaza ve Ümmühani beynlerinde kaldığı şer‘an zâhir oldukdan sonra mezbûre Ümmühani Hatun tarafından husûs-ı âti’l-beyâna ber-vech-i âtî da‘vâ[ya] vekâlet eden zevci İbrahim Beşe b. Hudâverdi nâm kimesne meclis-i ma‘kūd-ı mezbûrda mahmiye-i mezbûrede Tercüman Ali vakfına bi’l-fi‘il mütevellî olan bâ‘isü’l-kitâb es-Seyyid Abdülaziz Efendi b. es-Seyyid Mehmed Efendi nâm kimesne mahzarında üzerine da‘vâ ve takrîr-i kelâm edip müteveffâ-yı mezbûrun terekesinden olup zikrolunan Kâtib Muslihiddin Mahallesi’nde vâki‘ etrâf-ı erba‘adan Halil Çelebi ve Muhzır Veli Dede ve Kemerci Mehmed ve İbrahim Ağa vakfı ve tarîk-ı hâs ile mahdûd fevkānî iki bâb oda ve bir matbah ve bir kiler ve bir sofa ve bir su kuyusu ve bir kenîf ve bir mikdâr bahçeyi müştemil olan menzil mezbûrân Ümmühani ve Murtaza beynlerinde müşterek kalmağla mezbûr <> Murtaza’nın menzil-i merkūmda olan iki sehim hisse-i şâyi‘asını hâl-i sıgārında vasîsi olan vesâyeten yüz kırk esedî guruşa müvekkile-i mezbûre Ümmühani’ye bey‘ ve teslîm edip ve mezbûre Ümmühani dahi ba‘de’l-iştirâ ve tesellüm semen-i mezbûrun yetmiş guruşu mukābelesinde müvekkile-i mezbûre Ümmühani müteveffâ-yı mezbûrun terekesinden olup zikrolunan Tercüman Yunus Mahallesi’nde vâki‘ etrâf-ı erba‘adan Yusuf Beşe ve Himmet Dede ve Kabasakal demekle ma‘rûf Odabaşı mülkleri ve tarîk-ı âm ile mahdûd bir bâb fevkānî ve bir bâb tahtânî oda ve kenîf ve bahçeyi müştemil olan mülk menzilden bir sehim hisse-i şâyi‘asını sagīr-i mezbûr için vasîsi olana bey‘ ve teslîm edip vasîyy-i mezbûr dahi iştirâ ve tesellüm etmekle zikrolunan Kâtib Muslihiddin Mahallesi’nde vâki‘ olan menzil-i mahdûd-ı mezbûrun üç sehimden bir sehm-i şâyi‘i ırsen ve iki sehm-i şâyi‘i dahi şirâen mezbûre Ümmühani’nin mülkü oldukdan sonra mezbûre Ümmühani menzil-i mahdûd-ı mezbûru bey‘e ve kabz-ı semenine tarafından beni tevkîl ben-dahi ba‘de-kabûlü’l-vekâle menzil-i mahdûd-ı mezbûru bundan akdem mütevellî-i mezbûr es-Seyyid Abdülaziz Efendi’ye semen-i misli olan iki yüz on guruşa bey‘ ve teslîm ol dahi vakıf için iştirâ ve tesellüm etmekle hâlâ semeni olan meblağ-ı mezbûr iki yüz on guruşu mütevellî-i mezbûrdan taleb eylediğimde bana edâdan imtinâ‘ eder suâl olunup alıverilmesi matlûbumdur dedikde mütevellî-i mezbûr es-Seyyid Abdülaziz Efendi cevâbında menzil-i mahdûd-ı mezbûru merkūm İbrahim Beşe’den vakf-ı akār olmak üzre vakıf için iki yüz on guruşa iştirâ ve kabûl eylediğini ikrâr edip lâkin mezbûr İbrahim Beşe’nin henüz vekâleti sâbite olmamağla câiz ki mezbûre Ümmühani tevkîlini inkâr edip semen-i mezbûru dahi mezbûr İbrahim Beşe’nin yedinde helâk olmadan bana zarar terettüb eyleye vech-i muharrer üzre vekâleti muvâcehemde isbât etmedikçe semen-i ma‘lûmu mezbûr İbrahim Beşe’ye def‘ etmem deyücek mezbûr İbrahim Beşe’den vekâletine mübeyyine beyyine taleb olundukda udûl-i Müslimînden ve mezbûre Ümmühani’nin zâtını ma‘rifet-i şer‘iye ile ârifân olup zikrolunan Tercüman Yunus Mahallesi sükkânından Halil Beşe b. Hızır ve Hasan Beşe b. Hüseyin ve Cafer b. Abdullah nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka mezbûre Ümmühani zikrolunan Kâtib Muslihiddin Mahallesi’nde menzilini bey‘e ve kabz-ı semene ve semenini kendüye îsâle ve kabz [ve] îsâl mütevakkıf olduğu umûrun küllîsine tarafından bizim huzûrumuzda zevci mezbûr İbrahim Beşe’yi vekîl ve nâib-i menâb nasb ve ta‘yîn edip ol dahi vekâlet-i merkūmeyi kabûl eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vekîl-i mezbûr İbrahim Beşe meclis-i mezbûrda mütevellî-i mezbûr mahzarında i‘âde-i kelâm edip edâsına tenbîh olunan [74b] semen-i mezbûr iki yüz on guruşu mütevellî-i mezbûr yedinden bi’l-vekâle ahz ü kabz eyledim min-ba‘d menzil-i mahdûd-ı mezbûrda zevcem müvekkile-i mezbûrenin kat‘a alâka ve medhali kalmamışdır dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû [ma‘an] irsâl olunan Mahmud Çelebi b. Eyüb ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Rebî‘i’l-âhir li-sene ihdâ ve tis‘în ve elf. Şuhûdü’l-hâl: Hasan Efendi b. Osman, Muslı Çelebi el-müezzin, Mehmed Çelebi b. Receb, Mustafa Bey b. Derviş, Durmuş Bey b. Abdi ve gayruhum mine’l-huzzâr.