Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 363 Hüküm no: 336 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil İbrahim’in evini karısı Hatice bt. Kasım’a sattığı Mahmiye-i İstanbul’da Yenibahçe kurbünde Karabaş Mahallesi’nde sâkin el-Hâc Halil İbrahim nâm kimesne meclis-i şer‘-i hatîr-i enverde zevcesi işbu bâ‘isetü’l-kitâb Hadîce bt. Kasım nâm hatun mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafı ba‘zan Gencihan Hatun menzili ve ba‘zan Âişe bt. Mustafa menzili ve bir tarafı Hadîce bt. el-Hâc Halil mülkü ve iki tarafı tarîk-ı âm ile mahdûd fevkānî bir bâb oda ve tahtânî iki bâb oda ve bir ahır ve bir kenîf ve bir mikdâr arsa-i hâliyeyi müştemil mülk menzilimi bi-cümleti’t-tevâbi‘ ve’l-levâhık mezbûre Hadice’ye on beş bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr on beş bin akçeyi yedinden alıp kabz eyledim ba‘de’l-yevm menzil-i mezbûr mezkûre Hadîce Hatun’un mülk-i müşterâsıdır keyfe mâ teşâ’ mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Hüseyin Efendi b. Yunus, Mücellid Mehmed Çelebi b. ( ), Mestçi Hüseyin Beşe b. ( ), Berber Mehmed Çelebi b. ( ), el-Hâc Ramazan b. Şa‘ban, Berber Mustafa Çelebi b. ( ).