Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 363 Hüküm no: 337 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed adlı küçük çocuğa nafaka takdir edildiği Medîne-i Ebî Eyyûb-i Ensârî -radıye anhü’l-Bârî- mahallâtından Otakçıbaşı Mahallesi sâkinelerinden Fâtıma bt. Hasan nâm hatun meclis-i şer‘-i hatîr-i lâzımü’t-tevkīrde bâ‘isü hâze’l-kitâb zevc-i muhâlı‘ı işbu hazır bi’l-meclis Mehmed Çelebi b. Ali’nin firâşından hâsıl ve benden mütevellid ve hâlâ hacr ve terbiyemde olan Mehmed nâm sagīrin nafaka ve kisve ve sâir havâyic-i asliyesi için kadr-ı ma‘rûf-ı mezbûr üzerine nafaka takdîr olunması matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri dahi sagīr-i mezbûrun nafaka ve kisve ve sâir havâyic-i lâzımesi için babası mezbûr Mehmed Çelebi üzerine yevmî dörder akçe takdîr edip meblağ-ı mefrûz-ı mezkûru vech-i muharrer üzre sagīr-i mezbûrun nafaka ve kisve ve sâir levâzım-ı mühimmesine harc ve sarfa ve vakt-i zarûretde istidâneye ve lede’z-zafer mezbûr Mehmed Çelebi üzerine rücû‘a mezbûre Fâtıma’ya izin verilip mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mehmed Çelebi b. Ali, Ömer Beşe b. Mehmed, Veli Beşe b. Mehmed, Veli Beşe b. Şa‘ban, Mehmed Çelebi b. Haydar, Ahmed Çelebi b. Piyale.