Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 364 Hüküm no: 338 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bıçakçı Sinan vakfına ait arsayı tasarrufunda bulunduran Belkıs bt. Abdullah’ın söz konusu arsayı Mustafa Ağa b. Ali’ye ferağına vakfın mütevelliyesi tarafından izin verildiği Dârü’l-hilâfeti’l-aliyye Kostantıniyye el-mahmiye’de merhûm Bıçakçı Sinan vakfından olup mahmiye-i mezbûrede Seferikoz Mahallesi’nde vâki‘ zikri âtî arsanın mütevelliyesi olan Âişe bt. Cafer nâm hatun zâtını ma‘rifet-i şer‘iye ile ârifân olan Abdurrahman b. Yusuf ve Şa‘ban Efendi b. Ahmed ta‘rîfleriyle mu‘arrefe oldukdan sonra meclis-i şer‘-i şerîf-i enverde hâlâ İstanbul ağası olan işbu bâ‘isü’l-kitâb umdetü’l-eşbâh Mustafa Ağa b. Ali mahzarında bi’t-tev[liye] ikrâr ve i‘tirâf edip mahalle-i mezbûrede vâki‘ bir tara[fı] el-Hâc İlyas mülkü ve bir tarafı el-Hâc Kadri vakfı olan menzil ve iki tarafı tarîk-ı âm ile mahdûd iki bâb fevkānî oda ve bir sofa ve tahtânî iki bâb oda ve bir matbah ve bi’r-i mâyı müştemil menzilin ebniyesi Saraylı Belkıs bt. Abdullah nâm hatunun mülkü ve arsası vakf-ı mezbûra beher mâh kır[k] akçe mukāta‘a ile tasarrufunda olmağla mezbûre Belkıs ebniye-i memlûkesini semen-i ma‘lûma merkūm Mustafa Ağa’ya bey‘ ve teslîm ve arsasını dahi mezbûra ferâğ ve tefvîz etmişidi mezbûre Belkıs’ın mârrü’z-zikr arsayı ferâğ ve tefvîzine ben tevliyetim hasebiyle izin verdim mukāta‘a-i mezkûresini cânib-i vakfa edâ edip kimesne tasarrufuna mâni‘ olmaya dedikde gıbbe[‘t-tasdîkı’ş-şer‘î] mâ-hüve’l-vâki‘ bi’t-taleb ketb olundu. Fi’l-yevmi’s-sânî min- Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mehmed Efendi b. Mustafa el-imâm, Ahmed Çelebi b. Mehmed, Abdurrahman b. Yusuf, Şa‘ban Efendi b. Ahmed, Salih Haseki b. Mehmed, Mehmed Haseki b. Halil, Şa‘ban Ağa b. (...), Yusuf Çavuş b. Şa‘ban, Davud Çavuş b. (...).