Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 368 Hüküm no: 341 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağmalanan eşyasını Anton v. Laskari’nin elinde bulan Melkon v. Kirkor’a bu eşyanın iade edilmesi Mahmiye-i İstanbul’da Bitpazarı kurbünde Yenihan’da sâkin tüccârdan işbu bâ‘isü’l-vesîka Melkon v. Kirkor nâm Ermeni Dîvân-ı Hümâyûn-ı sa‘âdet-makrûnda akd olunan meclis-i şer‘-i şerîfde sâbıkā Boğdan voyvodası olup mahmiye-i mezbûrede Fener kapısı hâricinde sâkin Anton v. Laskari tarafından husûs-ı âti’z-zikre vekîl olup Yorgaki v. Dimitri ve Panayot v. Yanaki şehâdetleriyle şer‘an vekâleti sâbite olan Meldon v. Minas muvâcehesinde üzerine da‘vâ ve takrîr-i kelâm edip mezbûr Anton târih-i kitâbdan dört sene mukaddem Boğdan voyvodası iken ben ticâretle Boğdan’a varıp Yaş nâm şehre iki sâ‘at karîb olan mahalle nüzûl eylediğimde gece içinde basılıp yedimde mülk ve hakkım olan ikisi kır ve ikisi doru dört re’s koçu bargiri ve bir al at ve bir demir kır at ve on beş kîse esedî ve iki bin altın ve beş kîse hurde akçe ve yirmi beş tahta samur kürk ve otuz beş vukıyye kehrübâ ve beş yüz guruş kıymetli ayna ve iki koçu arabası ve on beş yaşında Rusiyyü’l-asl Şahin nâm gulâm ve on yaşında Rusiyyü’l-asl İvaz nâm gul[â]mım nehb ve gāret olunup hatta beş gün sonra zikrolunan dört re’s bargir ve iki re‘s at ve iki araba ve iki gulâmımı mezbûr Anton yedinde bulup lâkin ol diyârda ahz mümkin olmamağın suâl olunup a‘yânı mevcûd ise aynlarını müstehlek ise ba‘de’s-sübût kıymet-i şer‘iyelerini merkūm Anton bana red ve teslîm etmek üzre vekîl-i mesfûra tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda yine tüccârdan olup mahmiye-i mezbûrede Atpazarı kurbünde İmâmoğlu odalarında sâkin Diyârbekirli Tohman v. Tomacan ve hân-ı mezkûrda sâkin Mayrom v. Ane nâm Ermeniler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ târih-i mezkûrda müdde‘î-i mezbûr Yaş nâm şehre iki sâ‘at karîb olan mahâlde nüzûl ve [gece] içinde basılıp gāret ve ahz olunan eşyâsından bâlâda tafsîl olunan dört re‘s bargir ve bir al at ve bir demir kır at ve iki koçu arabası ve on beş yaşında Rusiyyü’l-asl Şahin ve on yaşında Rusiyyü’l-asl İvaz’ı biz müvekkil-i mezbûrun yedinde mâlikâne mutasarrıf olmak üzre mu‘âyene ve müşâhede eyledik biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı mezbûrânı suâl ve tezkiye için savb-ı şer‘-i kavîmden irsâl olunan Mustafa Efendi b. Abdülaziz evvelâ zikrolunan odalara varıp ahâlîsinden Vasat v. Minas ve Diyârbekirli Maralam v. Merkanos ve Şahin v. Osali ile yine Diyârbekirli Himmet b. Davud ve İvaz b. Abdullah ve Hasan b. Abdullah nâm kimesnelerden mezbûr Tohman’ın keyfiyet-i hâlini istihbâr etdikde mezbûrun makbûlü’ş-şehâde olduğunu her biri haber verdikden sonra hân-ı mezbûra varıp anda sâkin Vasil v. Sefer ve Semaven v. Minas ve Avanos v. Yasaf ve Serkiz v. Caker ve Yakoş v. Sefer’den mezbûr Mayrom’un keyfiyet-i hâlini istihbâr etdikde her biri kezâlik mezbûrun makbûlü’ş-şehâde olduğunu haber vermeğin vâki‘ hâli mezbûr Mustafa Efendi mahâllinde ketb ü terkīm edip ba‘dehû ma‘an irsâl olunan Hasan Beşe b. Cum‘a ile meclis-i şer‘a gelip alâ-vukū‘ihî inhâ ve takrîr etmeğin emr-i suâl ve tezkiye tamam ve şehâdetleri makbûle oldukdan sonra mezbûr Melkon isbât olunan eşyânın kıymet-i şer‘iyelerini beyâna havâle olunmağın mâ-vaka‘a bi’t-taleb ketb olundu. Fi’l-yevmi’l-hâmis min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Umdetü’l-ekârim Çavuşbaşı Mehmed Ağa, umdetü erbâbü’t-tastîr Tezkireci Ali Efendi, zübdetü erbâbü’l-kalem Tezkireci Mustafa Efendi, Muhzırbaşı Osman Ağa, el-Hâc Kemâleddin Ağa b. Müyesser.