Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 370 Hüküm no: 343 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Sinan Efendi’nin terekesinden aynı anne ve babadan kardeşi olduğunu ispatlayan Bali b. Mehmed’in de pay alması Vilâyet-i Rumeli’nde hâlâ Draç kādısı olan Mehmed Rıza Efendi b. Abdullah b. Ahmed imzâsıyla mümzâ ve hatmiyle mahtûm ve târih-i kitâb senesi Saferü’l-hayr[ının] yirmi yedinci günü târih ile müverrah nakl-i şer‘î vârid olup mazmûnu zikrolunan Draç kazâsına tâbi‘ Durezek nâm karye sükkânından Bali b. Mehmed nâm kimesneden vech-i âtî üzre da‘vâ-yı sahîha-i şer‘iye ile mesbûk istişhâd-ı şer‘î sudûrundan sonra udûl-i Müslimînden olup yine karye-i mezbûrede sâkin Mehmed b. Mehmed b. Yusuf ve Hüseyin b. İlyas b. Hasan nâm kimesneler nakl ve tahvîl için mahâll-i cerh ve ta‘dîle hâzırân olup şöyle edâ-i şehâdet-i şer‘iye eylediler ki fi’l-asl karye-i mezbûre ahâlîsinden olup mahrûse-i Edirne’de Kıyık Mahallesi’nde mütemekkin ve arpa emîn kâtibi iken bundan akdem vefât edip terekesi mahrûse-i mezkûrede zevcesi Gülistan bt. Abdullah ile ve sulbiye kızları Fâtıma ve Hanife ve Havva yedlerinde mazbûta idüğü mesmû‘umuz olan Sinan Efendi ile müdde‘î-i mezbûr Bali li-ebeveyn karındaşlar olup babaları ismi Mehmed b. Hüseyin ve anaları ismi Fâtıma bt. Mehmed ve maskat-ı re’sleri karye-i mezkûrede [olup] müteveffâ-yı mezbûrun verâseti mezkûrât Gülistan ve Fâtıma ve Hanife ve Havva ile min-ciheti’l-usûbeti’n-nesebiye mezbûr Bali’ye münhasıradır gayrı vâris ve terekesine müstahakk-ı âhar olduğu ma‘lûmumuz değildir müteveffâ-yı mezbûrun terekesinden bi-hasebi’l-irsi’ş-şer‘î isâbet eden hissesini vaz‘-ı yed edenlerden müsteşhid-i mezbûr için hakk-ı taleb ve ahz vardır biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra mezbûr Bali müteveffâ-yı mezbûrun terekesinden hisse-i irsiyesini vâzı‘u’l-yed olanlardan taleb ve da‘vâ ve ahz ü kabz ve kendüye îsâle ve ahz ü kabz ve îsâl mütevakkıf olduğu umûrun cümlesine sulbî oğlu Hasan nâm kimesneyi tarafından vekîl edip ol dahi vekâlet-i mezbûreyi kabûl eylediğini hâvî bulunmağın nakl-i mezbûr vekîl-i mezkûr talebiyle tereke-i müteveffâ-yı mezbûra vâzı‘u’l-yed olan mezbûre Gülistan Hatun muvâcehesinde feth ve kırâet ve istintâk olundukda mezkûre Gülistan tereke-i müteveffâ-yı mezbûra vaz‘-ı yedini ikrâr lâkin nakl-i mezkûrun mevlânâ-yı mezbûr kıbelinden vürûdunu inkâr edicek müdde‘î-i mezbûrdan nakl-i mesfûrun mevlânâ-yı mezbûr kıbelinden vürûduna beyyine taleb olundukda zeyl-i nakl-i mezbûrda muharrerü’l-esâmî olan şuhûd tarafından Hasan b. Ali b. Hüseyin ve Sinan b. Mehmed b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu nakl-i mezbûr hâlâ Draç kādısı olan mezbûr Mehmed Rıza b. Abdullah b. Ahmed kıbelinden vârid olup bizim huzûrumuzda imzâ edip ve mühürleyip mazmûnunu ba‘de’l-kırâet hat ve hatmine bizi işhâd eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Ahmed Çelebi b. Abdurrahman, Osman Ağa Muhzırbaşı, Mehmed Çelebi b. Haydar, Ahmed Çelebi b. Piyale, Mustafa Çelebi b. Abdülaziz. [Beyaz]