Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 371 Hüküm no: 344 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kenan Ağa b. Abdullah’ın Mustafa Çelebi b. Mehmed’deki alacağını teslim aldığı Mahmiye-i İstanbul’da Küçük Ayasofya’da Hüseyin Ağa Mahallesi sükkânından Kenan Ağa b. Abdullah meclis-i şer‘-i hatîr-i lâzımü’t-tevkīrde yine mahmiye-i mezbûrede Hocapaşa Mahallesi’nde sâkin işbu bâ‘isü’l-kitâb Mustafa Çelebi b. Mehmed mahzarında ikrâr-ı tâm ve takrîr-i kelâm edip târih-i kitâbdan on ay mukaddem ben Aydın Sancağı avârızı bedeli cem‘ine me’mûr ve mezkûr Mustafa Çelebi Tire mütesellimi Mehmed Ağa nâm kimesnenin kethudâsı olmağla kasaba-i Nazilli’de sâkin gāib ani’l-meclis Ömer Efendi nâm kimesneyi bî-vech ba‘zı töhmet ile ithâm ve mezbûru habs edip ve yine kasaba-i mezbûre kurbünde Hacı Beğli nâm karye ahâlîsini dahi ihzâr [ve] karyenizde kan olmuşdur deyü habs ve eziyet etmekle merkūm Ömer Efendi’yi halâs için yedi yüz esedî ve karye-i mezbûre ahâlîsini halâs için yüz esedî ki min-haysü’l-mecmû‘ tahlîsleri için bi-gayr-ı hakkın sekiz yüz esedî guruşumu ahz ü kabz etmekle meblağ-ı mezbûru mezkûr Mustafa Çelebi’den da‘vâ ve müdde‘âmı şühûd-ı udûlle muvâcehesinde şer‘an isbât edip meblağ-ı mezbûru merkūm Mustafa Çelebi bana red ve teslîm etmek üzre hükm-i hâkimü’ş-şer‘ dahi lâhık olmuşidi el-hâletü hâzihî meblağ-ı mezbûr yedi yüz esedî guruşu mesfûr Mustafa Çelebi yedinden bi’t-tamam ve’l-kemâl ahz ü kabz ve tesellüm eyledim meblağ-ı mezbûrdan mezkûr Mustafa Çelebi’de bir akçe ve bir habbe hakkım kalmayıp bi-vechin mine’l-vücûh da‘vâ ve nizâ‘ım yokdur dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: İbrahim Ağa b. Mustafa, Yedekçi Mehmed Ağa Bezzâzistânî, Musa Çelebi b. Rıdvan, Mustafa Çelebi b. Sakazâde, Ahmed Çelebi b. Piyale.