Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 372 Hüküm no: 345 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ali’nin sahip olduğu evin yarı hissesini borcuna takas olarak Hüseyin Ağa b. Mustafa’ya sattığı Mahmiye-i İstanbul’da Yenibahçe kurbünde Karabaş Mahallesi’nde sâkine olup zâtını ma‘rifet-i şer‘iye ile ârifân İmâm Hasan Efendi b. Mustafa ve Müezzin Abdullah Çelebi b. Ramazan nâm kimesneler ta‘rîfleriyle mu‘arrefe olan Âişe bt. Ali nâm hatun meclis-i şer‘-i hatîr-i lâzımü’t-tevkīrde sâbıkā dâmadı olan işbu bâ‘isü’l-kitâb Hüseyin Ağa b. Mustafa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan kız karındaşım Emine nâm hatun mülkü ve bir tarafdan Sâniye nâm hatun mülkü ve iki tarafdan tarîk-ı âm ile mahdûd olup fevkānî iki bâb odayı ve bir sofayı ve altında bir matbahı ve müşterek su kuyusunu ve bir mikdâr bahçeyi müştemil olan mülk menzilimin nısf-ı şâyi‘ini cümle tevâbi‘iyle tarafeynden îcâb ve kabûlü hâvî bey‘-ı kat‘î ile iki yüz beş esedî guruşa mezbûr Hüseyin Ağa’ya bey‘ ve teslîm ol dahi iştirâ ve tesellüm eylediğinden sonra semeni olan meblağ-ı mezbûr iki yüz beş kıt‘a esedî guruşu cihet-i karz-ı şer‘îden mezbûr Hüseyin Ağa’ya zimmetimde deynim olan iki yüz beş guruşa takās ol dahi mukāssa ve kabûl eyledi ba‘de’l-yevm menzil-i mahdûd-ı mezbûrun nısf-ı şâyi‘inde benim kat‘a alâka ve medhalim kalmayıp mezbûr Hüseyin Ağa’nın mülk-i müşterâsı ve hakk-ı sırfı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min- Rebî‘i’l-âhir li-sene ihdâ ve tis‘în ve elf. Şuhûdü’l-hâl: Abdurrahman Efendi b. Ahmed, Ahmed Ağa b. Mehmed, Mustafa Çelebi b. Mehmed, Sabuncu Mehmed Çelebi b. Mustafa, Berber Mehmed Çelebi b. Şa‘ban, Yusuf Çelebi b. Ali.