Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 373 Hüküm no: 346 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Halil ve isimleri verilen diğer kişilerin Mustafa b. Müslim tarafından zulmen alınan malları konusunda onunla sulh oldukları Vilâyet-i Anadolu’da Bartın kurbünde Ulus kazâsına tâbi‘ Dodurga nâm karye sükkânından olup ber-vech-i âtî elli guruş kıymetli bir re’s katır iddi‘â eden Mehmed b. Halil ve Dereköyü nâm karye sükkânından olup yirmi guruş kıymetli bir doru kısrak ve bir guruş kıymetli bir top bez ve iki esedî iddi‘â eden Mehmed b. İbrahim ve İslâmlar nâm karye sükkânından olup elli guruş kıymetli biri kır ve biri siyah iki re’s katır iddi‘â eden Mustafa b. Şa‘ban ve Dağ dîvânında Kestane nâm karye sükkânından olup otuz guruş kıymetli bir re’s sarı katır ve otuz bir guruş kıymetli bir siyah katır ve dört keyl buğday iddi‘â eden Ali b. Eyüb ve Durmuş b. Hasan nâm kimesneler meclis-i şer‘-i hatîr-i lâzımü’t-tevkīrde mahrûse-i Galata’ya tâbi‘ Tophâne’de sâkin işbu bâ‘isü’l-kitâb es-Seyyid Mustafa b. Müslim mahzarında her biri ikrâr-ı tâm ve takrîr-i kelâm edip târih-i kitâbdan bir sene mukaddem kazâ-i mezbûrun avârızı cem‘ine me’mûr olan gāib ani’l-meclis el-Hâc Murad Ağa b. Receb tarafından mezbûr es-Seyyid Mustafa gelip zikrolunan karye ahâlîsinin azebânı bedelini tahsîle ben mübâşirim deyü bizi habs ve bedel-i mezkûr bi’t-tamam edâ olunmuş iken bi-gayr-ı hakkın mârrü’z-zikr katırlar ile ve bir kısrak ve bir top bez ve dört keyl buğdayı bizden zulmen ahz ü kabz etmekle hâlâ mezbûra zafer bulup me’hûzunun aynları mevcûd ise aynlarını müstehlek ise ba‘de’s-sübût kıymet-i şer‘iyelerini taleb ve da‘vâ eylediğimizde beynimizde münâza‘ât cereyân etmişidi el-hâletü hâzihî muslihûn tavassut edip da‘vâ-yı mezkûremizden cümlemizi merkūm es-Seyyid Mustafa ile altmış iki esedî guruş üzerine akd-i musâlaha olundukda biz dahi sulh-i mezbûru kabûl ve bedel-i sulh olan meblağ-ı mezbûr altmış iki esedî guruşu mezbûr es-Seyyid Mustafa yedinden alıp kabz edip ziyâdeye ve husûs-ı mezbûra müte‘allika âmme-i de‘âvî ve muhâsamât ve eymân ve mutâlebâtdan mezbûr Mustafa’yı ibrâ-i âmm-ı kātı‘u’n-nizâ‘la her birimiz ibrâ ve ıskāt eyledik fîmâ-ba‘d mezbûr ile da‘vâ ve nizâ‘ımız kalmadı dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: es-Seyyid Ali Bey b. (...) [Mus]tafa, el-Hâc Mehmed Beşe b. (...) [İbra]him, (...) (...) (...), Mustafa Beşe b. (...).