Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 374 Hüküm no: 347 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Abdi b. Abdurrahman’ın Ahmed Çavuş b. Halil’e açtığı alacak davasının reddedildiği Vilâyet-i Anadolu’da kasaba-i Malatya mahallâtından Sitaruz Mahallesi’nde sâkin el-Hâc Abdi b. Abdurrahman meclis-i şer‘-i şerîf-i enverde zümre-i râcilînden yirmi yedinci bölük çavuşlarından işbu bâ‘isü’l-kitâb Ahmed Çavuş b. Halil mahzarında üzerine da‘vâ ve takrîr-i kelâm edip mezbûr Ahmed Çavuş zimmetinde cihet-i karz-ı şer‘îden iki yüz yetmiş esedî guruş ve ber-vech-i maktû‘ taht-ı iltizâmımda olan Karahisar nâm karyede vâki‘ a‘şâr-ı şer‘iyemden bi-gayr-ı vechin fuzûlen zabt ve kabz ve istihlâk eylediği ma‘lûmü’l-mikdâr buğday ve arpanın kıymetleri olan yetmiş guruş ki cem‘an üç yüz kırk esedî guruşumu bana edâ ve teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Ahmed Çavuş cevâbında fi’l-hakīka müdde‘î-i mezbûra ciheteyn-i mezkûreteynden üç yüz kırk esedî guruş deynim olup lâkin mezbûr el-Hâc Abdi meblağ-ı mezbûru benden taleb ve ahz ü [kabza] kasaba-i mezbûrede sâkin Ömer Efendi b. Ahmed Efendi’yi tarafından vekîl etmekle meblağ-ı mezbûr üç yüz kırk guruşu vekîl-i mezbûra iki def‘ada tamamen edâ ve teslîm ol dahi bi’l-vekâle ahz ü kabz edip ve hatta mezbûr el-Hâc Abdi merkūm Ömer Efendi’yi ber-vech-i mübeyyen vekîl edip ol vechile merkūm Ömer Efendi’nin meblağ-ı mezbûru benden ahz ü kabzını tav‘an ikrâr ve işhâd dahi etmiş-iken iki def‘a beni ihzâr etdirdü[p] eziyetden hâlî değildir deyü mezbûru def‘le mukābele edicek gıbbe’l-istintâk mezbûr el-Hâc Abdi mezkûr Ahmed Çavuş’u iki def‘a ihzâr etdirdiğini ikrâr lâkin merkūm el-Hâc Abdi’nin tevkîl ve vekîli kabzını inkâr edicek mezbûr Ahmed Çavuş’[dan] def‘-i meşrûhuna beyyine taleb olundukda Dergâh-ı âlî yeniçerilerinin elli birinci bölükde sâkin Osman Çavuş b. Şa‘ban ve yine Malatya’dan olup mahmiye-i mezbûrede Sarıgörez’de müsâferet vechi üzre sâkin İsmail Çelebi b. Bayram nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr el-Hâc Abdi bundan akdem mezkûr Ahmed Çavuş’da ciheteyn-i mezkûreteynden olan cem‘an üç yüz kırk esedî guruşu mezbûr Ahmed Çavuş’dan kabza vekîlim olan merkūm Ömer Efendi bi’t-tamam ahz ü kabz ve tesellüm eyledi meblağ-ı mezbûr üç yüz kırk esedî guruşdan mezkûr Ahmed Çavuş’da bir akçe ve bir habbe hakkım kalmamışdır deyü bizim huzûrumuzda kirâren ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı mezbûrân kıbel-i şerî‘at-i şerîfeden sırren ve alenen ta‘dîl ve tezkiye olunup şehâdetleri hayyiz-i kabûlde vâkı‘a oldukdan sonra mezbûr el-Hâc Abdi bâlâda şerh ve beyân olunan minvâl üzre meblağ-ı mezkûru merkūm [Ahmed] Çavuş’dan taleb ve ahza mezkûr Ömer Efendi’yi vekîl etmekle ol dahi ba‘de-kabûlü’l-vekâle meblağ-ı mezbûru bi’t-tamam ahz ü kabzını tav‘an ikrâr ve i‘tirâf dahi etmeğin mezbûr el-Hâc Abdi’nin mu‘ârazası bî-şer‘ ve bilâ-vech olduğu zâhir ve müte‘ayyin olmağla bî-vech mu‘ârazadan mezbûr men‘ olunup mâ-vaka‘a bi’t-taleb ketb olundu. Fi’l-yevmi’l-hâmis min- Rebî‘i’l-âhir li-sene ihdâ ve tis‘în ve elf. Şuhûdü’l-hâl: Ahmed Efendi b. Mehmed Efendi, el-Hâc Kemâleddin Ağa Kethudâ-yı Hazret-i Efendi, Helvâcızâde Mehmed Ağa, Mustafa Efendi b. Abdülaziz, Mustafa Çelebi tâbi‘-i Hazret-i Efendi, Ahmed Çelebi b. Abdurrahman, Mehmed Efendi b. Mustafa, Ali Efendi Malatyalı, Hasan Beşe b. Cum‘a.