Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 376 Hüküm no: 349 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Derviş Ahmed’in evini Mehmed Çelebi b. Abdullah’a sattığı Mahmiye-i İstanbul’da Dülgerzâde Mahallesi sükkânından İbrahim Bey b. Derviş Ahmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Çelebi b. Abdullah nâm kimesne mahzarında bi-tav‘ihiikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûre hısnı ebvâbından Edirnekapısı dâhilinde Hacı Muhyiddin Mahallesi’nde vâki‘ bir tarafdan el-Hâc Ömer Ağa mülkü ve bir tarafdan Hüseyin Efendi odaları ve bir tarafdan Lefter nâm zimmî mülkü ve bir tarafdan tarîk-ı âm ile mahdûd olup fevkānî üç bâb odayı ve bir sofayı ve altında bir ahırı ve bir su kuyusunu ve eşcâr-ı müsmire ve gayr-ı müsmire bir mikdâr bahçe[yi] müştemil olan mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî şurût-ı müfsideden ârî bey‘-ı kat‘î ile yüz yirmi bir guruşa râyic [fi’l-vakt] otuz sekiz bin akçeye mezbûr Mehmed Çelebi’ye bey‘ ve teslîm ol dahi ber-vech-i muharrer iştirâ ve tesellüm eylediğinden sonra semeni olan meblağ-ı mezbûr otuz sekiz bin akçeyi mezbûr Mehmed Çelebi yedinden tamamen ahz ü kabz eyledim min-ba‘d menzil-i mahdûd-ı mezbûrda alâka ve medhalim kalmayıp mezbûr Mehmed Çelebi’nin mülk-i müşterâsı ve hakk-ı sırfı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Ahmed Efendi b. Abdülkadir, Ali Efendi b. Mehmed, Mehmed Halîfe b. Mustafa, Halil Beşe b. İbrahim, Hüseyin b. Muhterem, Ahmed Beşe b. Mustafa, Mehmed Bey b. Ahmed.