Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 377 Hüküm no: 351 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Mehmed’in çiftlik ve tarlalarını Mustafa Efendi b. Yusuf’a sattığı Mahmiye-i İstanbul’da Mollagürânî kurbünde Tahtaminâre Mahallesi’nde sâkin İbrahim Ağa b. Mehmed meclis-i şer‘-i enverde işbu bâ‘isü’l-kitâb eş-Şeyh Mustafa Efendi b. Yusuf mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup Vilâyet-i Rumeli’nde Vize kazâsına tâbi‘ Karapürçek nâm karyede vâki‘ bir tarafı Hüseyin Çelebi mülkü ve üç tarafı tarîk-ı âm ile mahdûd dâhiliyesi bir çardak ve iki anbâr ve üç tahtânî oda ve havluyu ve kenîf ve fırın ve bi’r-i mâyı ve hâriciyesinde bir oda ve iki ahır ve bir kebîr samanlık ve havluyu müştemil çiftlik ta‘bîr olunur mülk menzilimi ve on re‘s su sığırı ineği ve on re’s kara sığır ineği ve altı çift öküz ve sâir cemî‘ tevâbi‘ ve levâhıkı ve kâffe-i hukūk ve merâfıkı ile mezbûr eş-Şeyh Mustafa Efendi’[ye] üç yüz esedî guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve temlîk edip ol dahi iştirâ ve kabûl ve temellük edip mârrü’z-zikr çiftlik ile ma‘an taht-ı tasarrufumda olup karye-i mezkûrede vâki‘ lede’l-ahâlî ve’l-cîrân ma‘lûmü’l-hudûd ve’l-kat‘ seksen müd tohum isti‘âb eder tarlalarımı dahi ma‘rifet-i sahib-i arz ile seksen guruş bedel mukābelesinde mezbûr eş-Şeyh Mustafa Efendi’ye ferâğ ve tefvîz ol dahi tefevvüz ve kabûl eylediğinden sonra semeni olan meblağ-ı mezbûr ile bedel-i mesfûr cem‘an üç yüz seksen esedî guruşu yedinden alıp kabz edip onları mahâllinde kabz ve tasarrufa mezbûru taslît eyledim min-ba‘de’l-yevm mârrü’z-zikr çiftlik merkūm eş-Şeyh Mustafa Efendi’nin mülk-i müşterâsıdır [78b] ve arâzî-i mezkûre hakk-ı müfevvazıdır keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Ramazan Çelebi b. Ramazan, Veli Beşe b. Mustafa, Halil Çelebi b. Yahya, el-Hâc Ahmed, el-Hâc Hüseyin b. Nasuh, Ali Çelebi b. Abdullah.